گیرہارڈ شروئڈر روسی کمپنیوں سے مستعفی ہو جائیں، جرمن چانسلر

سابق جرمن چانسلر گیرہارڈ شروئڈر روسی حکومت کی انرجی کمپنیوں کے انتظامی بورڈز میں اعلیٰ حیثیت کے حامل ہیں۔ ستتر سالہ شروئڈر روسی صدر پوٹن اور کریملن کے کاروباری حلقے کے ساتھ دیرینہ بزنس رفاقت رکھتے ہیں۔

چانسلرشپ کے بعد انگیلا میرکل کی مصروفیات کیا ہوں گی؟

وہ روس کے توانائی کے بڑے ادارے 'روس نیٹ‘ کے سپروائزری بورڈ کے سربراہ بھی ہیں۔ اس کے علاوہ وہ کسی حد تک متنازعہ خیال کیے جانے والے قدرتی گیس کی فراہمی کے منصوبوں نارتھ سٹریم ون اور نارتھ سٹریم ٹو کے نگران بورڈز میں بھی کلیدی حیثیت رکھتے ہیں۔

جرمنی میں شروئڈر کے روسی صدر پوٹن اور روسی انرجی کمپنیوں سے تعلقات پر گہری تشویش پائی جاتی ہے اور اب تنقید بھی کی جا رہی ہے۔ یوکرین پر روسی حملے کے بعد سے کسی حد تک جرمن سیاسی اور سماجی حلقے اس تعلق پر ندامت بھی محسوس کرتے ہیں۔

چانسلر شولس کا بیان

جرمن پبلک ٹیلی وژن زیڈ ڈی ایف پر ایک بیان دیتے ہوئے وفاقی چانسلر اولاف شولس نے کہا کہ ان کے خیال میں اب یہ مناسب نہیں رہا کہ گیرہارڈ شروئڈر ان مناصب پر فائز رہیں اور یہ صحیح ہو گا کہ وہ یہ عہدے چھوڑ دیں۔

شولس نے اس امر پر زور دیا کہ ایک عام شہری کے طور پر بھی انہیں ان عہدوں سے علیحدگی اختیار کر لینا چاہیے۔ موجودہ جرمن چانسلر کا کہنا تھا کہ شروئڈر جرمنی کے سابق سربراہِ حکومت ہیں اور موجودہ حالات میں ان کے کاروباری تعلقات کی اہمیت ان کی شخصیت سے زیادہ محسوس کی جا رہی ہے۔

سابق جرمن چانسلر شروئڈر کی حیثیت پوٹن کے پیادے کی سی ہے، ناوالنی

اولاف شولس نے مزید کہا کہ کسی دفتر کو چھوڑ دینے کے بعد بھی ذمہ داریاں ختم نہیں ہو جاتیں بلکہ ان کا احترام باقی رہتا ہے۔ انہوں نے یہ بھی کہا کہ انہیں یقین ہے کہ شروئڈر کے قریبی احباب انہیں اس مناسبت سے کوئی بہتر فیصلہ کرنے کا قائل کر لیں گے۔

گیرہارڈ شروئڈر

سن 1998 سے سن 2005 تک گیرہارڈ شروئڈر جرمنی کے چانسلر تھے۔ ان کے بعد اس منصب پر سن 2005 کے وفاقی انتخابات میں کامیابی حاصل کر کے انگیلا میرکل براجمان ہوئی تھیں۔

چانسلر کے منصب کو چھوڑنے کے بعد شروئڈر نے سن 2006 میں نارتھ سٹریم گیس پائپ لائن پراجیکٹ میں اہم منصب سنبھالا تھا۔ شروئڈر کے چار ساتھی رواں ہفتے کے اوئل میں اپنے اپنے عہدوں کو خیرباد کہہ چکے ہیں۔ جرمن فٹ بال کلب بوروسیا ڈورٹمنڈ نے بھی شروئڈر کی اعزازی رکنیت ختم کرنے کا اعلان کر دیا ہے۔

جرمنی کے لیے روسی گیس

نارتھ سٹریم ٹو گیس پائپ لائن پراجیکٹ بحیرہ بالٹک کے پانیوں  کے نیچے بچھایا گیا ہے اور یہ یوکرین کو منفی کرتے ہوئے براہ براست گیس جرمنی کو پہنچانے کا منصوبہ ہے۔

’سابق جرمن چانسلر شروئڈر روس کے لیے لابی کرتے ہیں‘

یہ منصوبہ مکمل ہو چکا ہے لیکن اس کے ذریعے جرمنی کو گیس کی فراہمی ابھی شروع نہیں ہوئی۔ اس وقت بھی جرمنی کو قدرتی گیس کی ترسیل نارتھ سٹریم ون پائپ لائن سے کی جا رہی ہے۔

ع ح / م م (ڈی پی اے، اے پی، اے ایف پی)