کورونا لاک ڈاؤن، کیا جرمنی میں جلد تمام پہیے رُک جائیں گے؟

وبائی امراض پر ریسرچ کرنے والے برلن کے مشہور زمانہ رابرٹ کاخ انسٹیٹیوٹ نے اس ہفتے کورونا وائرس کے پھیلاؤ اور اس کے نتیجے میں پیدا ہونے والی بیماری کووڈ انیس کے مریضوں کی تعداد میں تشویش ناک اضافے کی نشاندہی کی۔ اس صورتحال سے یہ امر واضح ہوتا جا رہا ہے کہ  یورپ کے دیگر ممالک کی طرح جرمنی بھی پابندیوں میں مزید سختی اور ممکنہ طور پر دوسرے لاک ڈاؤن کی طرف تیزی سے بڑھ رہا ہے۔ اب ماہرین اس امر پر غور کر رہے ہیں کہ آنے والے ہفتوں اور مہینوں میں جو صورتحال سامنے آئے گی، اس سے موسم بہار تک عوامی زندگیوں پر مزید کیا فرق رونما ہو سکتا ہے؟

عوام کی حوصلہ افزائی

رابرٹ کاخ انسٹیٹیوٹ کے صدر لوتھر وائلر نے جمعرات کو گزشتہ 24 گھنٹوں میں کووڈ۔19 کے 11200 نئے کیسز درج کیے جانے کی خبر دیتے ہوئے کہا کہ یہ پہلا موقع ہے کہ جرمنی میں کسی ایک دن میں کورونا وائرس کے 10000 سے زائد کیسز درج ہوئے ہیں۔ اس کے باوجود لوتھر وائلر کا کہنا تھا،''کورونا کیسز کی تعداد میں اتنا بڑا اضافہ جرمنی میں اس سے پہلے ناقابل تصور تھا۔ تاہم اس وقت ہمارے پاس وائرس کے مزید پھیلاؤ کو کم کرنے کا موقع ہے۔ اس میں ہم ابھی بے اختیار نہیں ہیں۔‘‘ وائلر نے زور دے کر کہا کہ ہر شہری قوانین کی پاسداری کو یقینی بناتے ہوئے انفکشن کے خطرے کو نمایاں طور پر کم کرنے میں اہم کردار ادا کر سکتا ہے۔ انہوں نے حفاظتی اقدامات کے کلیدی اصولوں کو ایک بار پھر دھراتے ہوئے کہا کہ،''وبائی امراض کے خلاف جنگ میں ماسک پہننے، سماجی فاصلہ برقرار رکھنے اور ہاتھ دھوتے رہنا مرکزی اہمیت کے حامل عوامل ہیں۔‘‘

ماہرین کا کہنا ہے کہ اس وقت یعنی موسم خزاں میں اس طرح کے اقدامات جرمن سیاست کا اہم ترین مقصد بن چکا ہے۔ رواں برس کے موسم بہار کی نسبت انفکشن کی تعداد میں اضافے کو روکنے کے لیے ہر کوئی تیار ہے۔ اب ماہرین اس وائرس کو بخوبی پہچان چُکے ہیں۔ مارچ ، اپریل میں جس وقت پہلا لاک ڈاؤن ہوا تھا تب اس بات کا بھی بے حد خوف پایا جاتا تھا کہ ہسپتالوں میں انتہائی نگہداشت کے یونٹس کی تعداد ضرورت سے کہیں کم ہے اور ان کی گنجائش تیزی سے اپنی آخری حد کو چھونے لگی ہے تاہم اس قسم کے خوف کو اب بے بنیاد سمجھا جانا چاہیے۔

 ٹوئلٹ پیپرز کی پھر سے قلت                                   

اگر جرمنی میں دوسرا لاک ڈاؤن ہوا بھی تو اس کی نوعیت پہلے والے سے مختلف ہوگی۔ ریستوران اور خوردہ اشیا کے اسٹورز کے ساتھ ساتھ ڈے کیئر سینٹرزاور اسکول ابتدائی طور پر کھلے رہیں گے تاہم کورونا انفکشن کی موجودگی اور اس میں اضافے کی شرح پر اس کا انحصار ہوگا۔ سماجی رابطے، پارٹیاں،اجتماعات وغیرہ تیزی سے محدود ہو جائیں گے۔ سب سے زیادہ اہمیت ' انفرادی ذمے داری ‘ کو حاصل ہوگی۔ کچھ اسٹورز کے مالکین کا کہنا ہے کہ ان کی دکانوں میں  ٹائلٹ پیپرز کی قلت ہوتی جا رہی ہے۔ اس وقت سُپر مارکیٹس اور ان کی چینز نے کہا تھا کہ حفظان صحت سے متعلق اشیاء کی ذخیرہ اندوزی کا کوئی فائدہ نہیں کیونکہ ان کی ترسیل میں کوئی رکاوٹ نہیں ہے۔ یہی صورتحال اب بھی پائی جاتی ہے۔

کرسمس کی آمد پر یہ سب کچھ؟

تمام مغربی ممالک میں سب سے زیادہ پُر رونق تہوار کرسمس کا ہوتا ہے۔ اس کی تیاریاں ہفتوں پہلے سے شروع ہو جاتی ہیں۔ اس بار کا کرسمس کا ماحول مختلف ہونے کے امکانات زیادہ ہیں۔ جرمنی کے وبائی امراض کی ریسرچ کا برلن میں قائم ریسرچ انسٹیٹیوٹ 'شیریٹے‘ کے ماہر وائرولوجسٹ کرسٹیان ڈروسٹن نے اس بار کرسمس کے آس پاس ایک عارضی لاک ڈاؤن کی بات کی ہے۔ انہوں نے ایک ٹویٹ میں تحریر کیا،'' اس سے ملتا جلتا برطانیہ کا ایک خیال قابل غور  ہے اور ممکن ہے کہ جرمنی کی سیاسی قیادت اس طرح کے اقدامات کرے۔ جرمنی میں زیادہ تر کرسمس مارکیٹس کا انعقاد  پہلے ہی منسوح کیا جا رہا ہے، اس سے عوام کے موڈ پر منفی اثرات مرتب ہوں گے اور یہ کافی حد تک افسردہ ہوجائیں گے۔

ک م/ ع س/ ایجنسیاں