کرزئی سکیورٹی معاہدے پر دستخط کریں، جرمن وزیردفاع

چند روز قبل جرمن وزارت دفاع کا قلمندان سنبھالنے والی اُرسلا فان ڈیئر لاین نے کہا کہ افغانستان میں جرمنی کا فوجی مشن مکمل ہونے کو ہے اور وہ اس مشن کے مکمل ہونے کی منتظر ہیں۔

خیال رہے کہ جرمنی سن 2014ء کے بعد افغان سکیورٹی فورسز کی تربیت اور معاونت کے لیے اپنے آٹھ سو فوجی تعینات کرنے پر راضی ہے۔ فان ڈیئر لاین نے شمالی افغانستان میں جرمن فوجیوں سے خطاب میں کہا کہ افغانستان میں بہت کچھ حاصل کیا جا چکا ہے اور جرمنی چاہتا ہے کہ جو حاصل کیا گیا ہے، اس کا تحفظ کیا جائے۔

فان ڈیئر لائن نے منگل کے روز وزارت دفاع کا قلمندان سنبھالا تھا۔ وہ جرمنی کی پہلی خاتون وزیردفاع ہیں۔ مزار شریف میں جرمن فوجی اڈے مرمل میں ثقافتی کرسمس مارکیٹ میں موجود تقریباﹰ 300 فوجیوں سے خطاب کرتے ہوئے ان کا کہنا تھا، ’’مجھے انتہائی فخر اور خوشی ہے کہ میں آپ کی وزیردفاع ہوں۔‘‘ انہوں نے مزید کہا کہ وہ اس ذمہ داری کو انتہائی سنجیدہ سمجھتی ہیں۔

جرمن خبر رساں ادارے ڈی پی اے کے مطابق فان ڈیئر لاین کا دورہ افغانستان اس لیے بھی اہمیت کا حامل ہے کہ ہفتے کے روز نیٹو نے کابل حکومت کے ساتھ سن 2014ء کے بعد بھی نیٹو فوجی دستوں کے قیام کے سلسلے میں گفتگو کا آغاز کر دیا ہے۔ تاہم مغربی دفاعی اتحاد نیٹو کا کہنا ہے کہ وہ اس سلسلے میں کسی بھی معاہدے پر اس وقت تک دستخط نہیں کرے گا، جب تک کابل حکومت امریکا کے ساتھ باہمی سکیورٹی معاہدے پر دستخط نہیں کر دیتی۔

واضح رہے کہ امریکا اور افغانستان کے درمیان طے پانے والے باہمی سکیورٹی معاہدے کو لویہ جرگہ کی جانب سے منظوری مل چکی ہے، تاہم صدر کرزئی کا کہنا ہے کہ کابل حکومت اگلے برس اپریل میں صدارتی انتخابات سے قبل اس معاہدے پر دستخط نہیں کرے گی، تاہم امریکا کا مؤقف ہے کہ اس صورت میں امریکا افغانستان سے اپنے تمام فوجی نکالنے پر بھی غور کر سکتا ہے۔ امریکا کا کہنا ہے کہ افغانستان رواں برس کے اختتام تک اس معاہدے پر دستخط کر دے، جس کے تحت افغانستان میں سن 2014ء کے بعد بھی آٹھ تا بارہ ہزار غیرملکی فوجی قیام کر سکیں گے۔