کراچی میں کار بم دھماکا، کم از کم 45 افراد ہلاک

حکام کے مطابق دھماکا عباس ٹاؤن کے علاقے میں دو رہائشی اپارٹمنٹس کے ایک بلاک کے سامنے ہوا، جس سے دو پانچ منزلہ عمارتوں کا سامنے کا حصہ بری طرح متاثر ہوا۔ دھماکے کے بعد ایک اپارٹمنٹ بلڈنگ میں آگ لگ گئی جس کی وجہ سے متاثرہ لوگ پھنس کر رہ گئے اور امدادی کاموں میں بھی مشکلات پیش آئیں۔

پاکستان کی اقتصادی شہ رگ کہلانے والا شہر کراچی کئی برسوں سے لسانی، سیاسی اور مذہبی تشدد کی لپیٹ میں ہے۔ گزشتہ برس یعنی 2012ء میں 2200 افراد ایسے ہی پر تشدد واقعات کی بھینٹ چڑھ گئے تھے، تاہم اس طرح کے بم دھماکے شاذ ونادر ہی ہوتے ہیں۔

کراچی کے ایک سینئر حکومتی اہلکار ہاشم رضا زیدی نے خبر رساں ادارے اے ایف پی کو بتایا، ’’کم از کم 45 افراد ہلاک ہوئے ہیں جبکہ 150 سے زائد افراد زخمی بھی ہیں۔ ہلاکتوں کی تعداد میں اضافہ ہو سکتا ہے کیونکہ زخمیوں کی نصف کے قریب تعداد کی حالت تشویشناک ہے۔ ‘‘

دھماکے کے وقت قریبی مسجد میں نماز ادا کرنے کے بعد نمازی واپس لوٹ رہے تھے۔ اے ایف پی کے مطابق دھماکے سے سینکڑوں گھروں اور دکانوں کو نقصان پہنچا ہے۔ زیادہ تر زخمیوں کو قریبی پٹیل ہستپال پہنچایا گیا۔ جہاں رقت آمیز مناظر دیکھنے میں آئے۔ زارو قطار روتی ہوئی ایک ماں کو اپنے کم عمر بیٹے کی تلاش تھی۔ اس خاتون نے اے ایف پی سے گفتگو کرتے ہوئے کہا، ’’ وہ بالکونی میں کھڑا تھا، وہ کہاں ہے؟‘‘

ہسپتال میں زیر علاج ایک شخص اعجاز علی کے مطابق وہ دھماکے کا نشانہ بننے والے اپارٹمنٹس میں سے ایک بلاک کی تیسری منزل پر اپنی بیوی اور دو بچوں کے ساتھ موجود تھے۔ اعجاز علی نے اے ایف پی کو بتایا، ’’اچانک ہم نے ایک زور دار دھماکے کی آواز سنی۔ ہمیں لگا کہ عمارت تباہ ہو رہی ہے۔ یہ بالکل ایسے ہی تھا جیسے زور دار زلزلہ آ گیا ہو۔‘‘

پاکستانی وزیر اعظم راجہ پرویز اشرف نے جو کراچی پہنچے ہوئے تھے، اس دھماکے کی شدید مذمت کی ہے۔ انہوں نے کراچی میں اپنی مصروفیات معطل کرکے امدادی کاموں کا جائزہ لیا۔

صوبہ سندھ کے سیکرٹری صحت سریش کمار نے خبر رساں ادارے اے ایف پی کو بتایا کہ دھماکے کے نتیجے میں 40 سے زائد افراد ہلاک ہو چکے ہیں اور ہلاکتوں کی تعداد میں اضافہ ہو سکتا ہے۔

aba/ng (AFP)