کراچی میں فٹ بال میچ کے بعد دھماکا، 11 افراد ہلاک

خبررساں ادارے اے ایف پی کے مطابق پاکستان پیپلز پارٹی کی مقامی رکن پارلیمنٹ ثانیہ ناز نے دھماکے کی تصدیق کرتے ہوئے ہلاکتوں کی تعداد گیارہ بتائی ہے۔ ان کا کہنا ہے کہ مرنے والوں کی عمریں چھ سال سے پندرہ برس کے درمیان ہیں۔
صوبائی وزیر اطلاعات شرجیل میمن نے بھی گیارہ ہلاکتوں کی تصدیق کی ہے۔ ان کا کہنا ہے کہ 24 افراد زخمی ہیں۔
پولیس کے مطابق بم ایک موٹر سائیکل میں لگایا گیا تھا جو میدان کے باہر کھڑی تھی۔ خبر رساں ادارے اے پی کے مطابق سینئر پولیس اہلکار رزاق دھاریجو کا کہنا ہے کہ دھماکا صوبائی وزیر جاوید ناگوری کی گاڑی کے قریب ہوا، جو لیاری میں مقامی ٹیموں کے درمیان نائٹ میچ دیکھنے کے بعد واپس جا رہے تھے۔
جاوید ناگوری محفوظ رہے ہیں۔ مرنے والوں میں تماشائی اور علاقے کے رہائشی شامل ہیں۔ دھاریجو نے بتایا کہ دھماکا ریموٹ کنٹرول سے کیا گیا۔
ایک پولیس اہلکار محمد جاوید نے قبل ازیں بتایا کہ زخمیوں کی تعداد 20 سے زائد ہے۔ خبر رساں ادارے اے ایف پی نے پولیس ہی کے حوالے سے زخمیوں کی تعداد 26 بتائی تھی۔
خیال رہے کہ لیاری میں فٹ بال انتہائی مقبول کھیل ہے۔ ابھی تک کسی نے اس حملے کی ذمہ داری قبول نہیں کی ہے۔
کراچی کی آبادی 18 ملین ہے اور ملک کی مجموعی قومی پیداوار کا 42 فیصد یہیں سے حاصل ہوتا ہے۔ تاہم اغوا اور قتل کی وارداتیں اس شہر کا معمول ہیں اور یہ برسوں سے نسلی، فرقہ وارانہ اور سیاسی تشدد کی لپیٹ میں ہے۔
کراچی میں ہونے والا یہ دھماکا پاکستان میں تشدد کے حالیہ سلسلے کا تازہ واقعہ ہے جس کے نتیجے میں ملک بھر میں 28 افراد ہلاک ہو چکے ہیں۔ ابھی منگل کو ہی صوبہ بلوچستان میں 13 کو اغوا کے بعد قتل کر دیا گیا۔
انہیں بسوں سے اغوا کیا جو صوبہ پنجاب کی طرف سفر کر رہی تھیں۔ بعدازاں ان کی لاشیں بلوچستان کے ضلع بولان کے علاقے مچھ میں ملیں۔ اس حملے کی ذمہ داری بھی کسی نے قبول نہیں کی۔