ڈینیئل پرل کیس سے بری ہونے والے پھر گرفتار

حکام کے مطابق عدالت کی جانب سے ملزمان کی رہائی کے خلاف اپیل دائر کی گئی ہے اور اسی تناظر میں ان ملزمان کو اس اپیل کے فیصلے تک جیل رکھنے کا فیصلہ کیا گیا ہے۔

ایک پاکستانی عدالت کی جانب سے برطانیہ میں پیدا ہونے والے عسکریت پسند احمد عمر سعید الشیخ سمیت چار ملزمان کو سن 2002 میں امریکی صحافی ڈینیئل پرل کے اغوا اور قتل کے جرم میں دی گئی سزا کو کالعدم قرار دے دیا تھا۔ مرکزی ملزم احمد عمر سعید شیخ کی سزائے موت قید میں بدل دی گئی تھی جبکہ تین دیگر ملزمان کی رہائی کا حکم بھی دے دیا۔ اس پیشرفت پر جمعرات کو امریکا نے شدید ردعمل ظاہر کیا تھا۔

اس عدالتی فیصلے اور امریکی تنقید کے بعد  جمعے کے دن پاکستانی وزارت داخلہ کی جانب سے بتایا گیا کہ یہ ملزمان بدستور جیل ہی میں رہیں گے اور ان کی رہائی کے خلاف اپیل پاکستان کی سپریم کورٹ میں داخل کرائی جائے گی۔

وزارت داخلہ کے بیان کے مطابق ان ملزمان کو دوبارہ گرفتار کر لیا گیا ہے اور وہ تین ماہ تک اس اپیل کو عدالت میں داخل کرائے جانے تک جیل ہی میں رکھے جائیں گے۔

وزارتی بیان میں کہا گیا ہے کہ حکومت دہشت گردوں کو کیفر کردار تک پہنچانے کے لیے تمام قانونی تقاضے پورے کرنے کے عزم پر قائم ہے۔

واضح رہے کہ عمر شیخ پر اغوا سے متعلق ثابت ہونے والے جرم کو ماتحت عدالت نے قائم رکھا تھا، تاہم وہ چوں کہ پہلے ہی سات برس کا عرصہ جیل میں گزار چکا ہے، اس لیے اگر حکومت مداخلت نہ کرتی، تو اسے رہا کیا جا سکتا تھا۔

38 سالہ امریکی صحافی ڈینیئل پرل امریکی  اخبار دا وال اسٹریٹ جرنل کے لیے کام کرتے تھے اور انہیں جنوری 2002 میں کراچی سے اس وقت اغوا کیا گیا تھا، جب وہ مسلم شدت پسندوں سے متعلق ایک خبر پر کام میں مصروف تھا۔ اغوا کے ایک ماہ بعد ان کی لاش ملی تھی، جو امریکا کے حوالے کر دی گئی تھی۔

امریکی سفیر برائے جنوبی ایشیا ایلیس ویلز نے اس اغوا اور قتل کے ملزمان کو بری کیے جانے کے عدالتی فیصلے کو 'دہشت گردی کے تمام متاثرین کی توہین‘ قرار دیا تھا، تاہم انہوں نے ملزمان کی رہائی کے خلاف اپیل کا خیرمقدم کیا ہے۔

اپنے ایک ٹویٹر پیغام میں ویلز نے لکھا، 'ڈینیل کے بزدلانہ اغوا اور قتل کے ذمہ داروں کو قرار واقعی سزا ملنا چاہیے۔‘‘

امریکی وزیرخارجہ مائیک پومپیو نے بھی ایک ٹویٹ میں کہا کہ امریل ڈینیئل پرل کو کبھی فراموش نہیں کرے گا۔

ع ت، ع ب  (روئٹرز، اے ایف پی)