پوٹن کی مودی سے ملاقات، گرمجوشی کا اظہار
1 جون 2017بھارتی وزیر اعظم نریندر مودی نے آج سینٹ پیٹرز برگ میں روسی صدر ولادیمیر پوٹن سے ملاقات کی ہے۔ اس ملاقات سے قبل دونوں رہنماؤں نے اس ملاقات کے حوالے سے نہایت گرمجوشی کا اظہار کیا۔
بھارتی وزیراعظم نریندر مودی کی روسی صدر ولادیمیر پوٹن سے یہ ملاقات روس کے دوسرے سب سے بڑے شہر سینٹ پیٹرز برگ میں آج جمعرات یکم جون کو ہوئی ہے۔ سینٹ پیٹرز برگ میں روس کا سب سے بڑا سالانہ معاشی فورم جاری ہے۔ اس تین روزہ ایونٹ کے دوران روس اور بھارت کے درمیان مختلف اقتصادی معاہدوں پر دستخط ہونے کی توقع کی جا رہی ہے۔
کریملن کی طرف سے جاری ہونے والے بیان کے مطابق بھارتی وزیراعظم کے ساتھ پرائیویٹ میٹنگ سے قبل پوٹن نے مودی سے مخاطب ہوتے ہوئے کہا، ’’آپ سے ملاقات اور باہمی اور بین الاقوامی امور پر بات چیت کے لیے موقع پر ملنے پر بہت خوش ہوں۔‘‘
ماسکو حکومت کی طرف سے بتایا گیا ہے کہ کریملن سالانہ اقتصادی فورم کے حاشیے میں ہونے والی اس ملاقات میں دونوں رہنماؤں نے تجارتی امور پر توجہ مرکوز رکھی۔ گزشتہ کچھ عرصے سے روس اور بھارت کے مابین اقتصادی تعاون میں کمی واقع ہوئی ہے۔
روس گزشتہ دو دہائیوں سے بھی زائد عرصے سے سینٹ پیٹرز برگ انٹرنیشنل اکنامک فورم نامی بین الاقوامی اقتصادی فورم کا انعقاد کراتا آ رہا ہے۔ اس فورم میں کاروباری رہنما اور سیاستدان شریک ہوتے ہیں۔ اس فورم کے موقع پر پوٹن دیگر کئی سربراہان سے بھی ملاقات کریں گے۔ ان میں اقوام متحدہ کے سیکرٹری جنرل انتونیو گوٹیرش اور آسٹریا کے چانسلر کرسٹیان کیرن بھی شامل ہیں۔
بھارتی وزیر اعظم نریندر مودی چار یورپی ممالک کے دورے کے دوران اس وقت روس میں ہیں۔ قبل ازیں وہ جرمنی اور اسپین بھی گئے تھے۔ اس چھ روزہ دورعے کے دوران روس کے بعد وہ فرانس جائیں گے۔