پاک بھارت فٹ بال سیریز، بھارتی کپتان کی باتیں

بنگلور کے فٹ بال اسٹیڈیم میں اتوار کو کھیلا جانے والا میچ دونوں ملکوں کے درمیان کھیلوں کی سرگرمیوں پر طاری جمود کے خاتمے کی طرف پہلا قدم ہے۔

نیوز ایجنسی اے ایف پی کے ساتھ باتیں کرتے ہوئے بھارتی قومی فٹ بال ٹیم کے کپتان سُنیل چھیتری نے امید ظاہر کی کہ اِس مِنی سیریز سے دونوں حریف ملکوں کے درمیان سیاسی ماحول کو بھی بہتر بنانے میں مدد ملے گی۔

چھیتری نے کہا:’’اب تک مَیں نے جتنے بھی میچ (پاکستان کے خلاف) کھیلے ہیں، وہ ایک عام میچ سے کہیں بڑھ کر تھے اور دونوں ٹیموں کو اس بات کا علم ہے۔ اُن (پاکستانی کھلاڑیوں) کے لیے بھی یہ ایک خصوصی مقابلہ ہے۔ انڈیا اور پاکستان کا مقابلہ ہمیشہ خصوصی اہمیت کا حامل ہوتا ہے۔‘‘

پاکستان ہو یا بھارت، برصغیر میں فٹ بال کوئی زیادہ مقبول کھیل نہیں ہے اور عام لوگ کرکٹ میں زیادہ دلچسپی رکھتے ہیں لیکن دونوں ملکوں کے درمیان عشروں پرانے معاندانہ تعلقات کی وجہ سے کسی بھی کھیل میں ان دونوں ملکوں کا باہمی مقابلہ ہمیشہ ان ملکوں کے عام شہریوں کی بھی توجہ حاصل کر لیتا ہے۔

چھیتری نے کہا:’’تاریخ آپ کو بتائے گی کہ اِن دونوں ملکوں کے باہمی تعلقات کو بہتر بنانے کے سلسلے میں کھیلوں نے ہمیشہ اِنہیں ایک دوسرے کے قریب لانے والے عنصر کا کردار ادا کیا ہے۔ کھیلوں کی وساطت سے تعلقات کو بہتر بنانا بے حد اہمیت رکھتا ہے، خاص طور پر اپنے ہمسایہ ممالک کے ساتھ۔‘‘

واضح رہے کہ بھارت نے کھیلوں کے شعبے میں پاکستان کے ساتھ باہمی تعلقات ممبئی میں 2008ء میں ہونے والے اُن ہولناک حملوں کے بعد معطل کر دیے تھے، جن کے لیے نئی دہلی حکومت نے پاکستان سے گئے ہوئے عسکریت پسندوں کو قصور وار ٹھہرایا تھا۔

کھیلوں کے شعبے میں اس جمود سے سب سے زیادہ نقصان کرکٹ کو پہنچا، جس کی محبت میں سرحد کے دونوں جانب کے کروڑوں شائقین دیوانے ہیں۔ اگرچہ پاکستان نے دسمبر 2012ء اور جنوری 2013ء میں محدود اوورز کی ایک سیریز کے لیے بھارت کا دورہ کیا تھا تاہم 2008ء کے بعد سے ابھی تک دونوں ملکوں کے درمیان کوئی باقاعدہ بڑی سیریز نہیں کھیلی گئی ہے۔

اتوار سے شروع ہونے والی دو میچوں کی فٹ بال سیریز دونوں ملکوں کی ٹیموں کو آئندہ مہینے جنوبی کوریا میں منعقد ہونے والی ایشین گیمز سے پہلے پہلے اپنی اپنی صلاحیتوں کو جانچنے اور اپنی کمزوریوں کو پرکھنے کا بھی موقع فراہم کرے گی۔

بتایا گیا ہے کہ بنگلور کے فٹ بال اسٹیڈیم کے باکس آفس کے ساتھ ساتھ آن لائن فروخت کے لیے پیش کیے جانے والے اتوار کے میچ کے ٹکٹ تیزی سے فروخت ہو گئے۔ اے ایف پی سے باتیں کرتے ہوئے آل انڈیا فٹ بال فیڈریشن کے میڈیا مینیجر کُنال مجگا اونکار نے کہا:’’بہت اچھا ریسپانس دیکھنے کو ملا ہے۔ ہم نے دو ہزار چار سو ٹکٹ آن لائن فروخت کے لیے پیش کیے تھے اور یہ سب بِک چکے ہیں۔ باکس آفس پر بھی ٹکٹ تیزی سے فروخت ہو رہے ہیں اور وہاں بھی اب تک پچاسی فیصد ٹکٹ بِک چکے ہیں۔‘‘

میچ کے موقع پر بنگلور فٹ بال اسٹیڈیم کے اندر اور باہر حفاظتی انتظامات سخت بنا دیے گئے ہیں۔ چار سال پہلے بنگلور کے کرکٹ اسٹیڈیم کے قریب ہونے والے دو بم دھماکوں میں کم از کم آٹھ افراد زخمی ہو گئے تھے، جن کے لیے بھارت کے مسلمان عسکریت پسندوں کو قصور وار ٹھہرایا گیا تھا۔

پاکستان کی طرح بھارت بھی ایک عرصے سے فٹ بال کے شعبے میں آگے آنے کے لیے ہاتھ پاؤں مار رہا ہے۔ فٹ بال کی بین الاقوامی گورننگ باڈی فیفا کی 208 ملکوں کی عالمی درجہ بندی میں بھارت کا نمبر 150 واں ہے جبکہ پاکستان اُس سے بھی کہیں پیچھے 164 ویں نمبر پر ہے۔

اتوار سترہ اگست کو شروع ہونے والی اس مِنی سیریز کے دوران دوسرا اور آخری فٹ بال میچ بُدھ کے روز کھیلا جائے گا۔