ٹرمپ نے سلیمانی کو گالی دے ڈالی

امریکی ریاست وِسکونسن کے شہر مِلواکی میں منگل 14 جنوری کی شام ایک انتخابی ریلی سے خطاب کرتے ہوئے صدر ٹرمپ نے قاسم سلیمانی کو گالی دیتے ہوئے انہیں ایرانی عوام کی تکالیف کی ایک بڑی وجہ قرار دیا: ''سلیمانی کی وجہ سے نوجوان خواتین اور مرد اپنے بازوؤں اور ٹانگوں کے بغیر زندگی گزار رہے ہیں۔‘‘

ٹرمپ نے اپنی بات جاری رکھتے ہوئے مزید کہا، ''اس ۔۔۔ کے بچے کی وجہ سے بہت بڑی تعداد میں لوگوں کی اس وقت ٹانگیں اور بازو نہیں ہیں۔‘‘ ٹرمپ نے سلیمانی کے بارے میں یہ بھی کہا کہ انہیں تو 20 برس قبل ہی ہلاک کر دیا جانا چاہیے تھا۔

ایرانی پاسداران انقلاب کی قدس فورس کے سربراہ جنرل قاسم سلیمانی کو تین جنوری کو عراقی دارالحکومت بغداد میں ایک امریکی فضائی حملے میں ہلاک کر دیا گیا تھا۔ اس اقدام کے بعد ایران اور امریکا کے درمیان تناؤ انتہائی شدید ہو گیا تھا جس کے بعد ایران نے آٹھ جنوری کو عراق میں موجود امریکی افواج کے دو اڈوں پر میزائل حملے بھی کیے تھے۔ ان حملوں میں کوئی جانی نقصان نہیں ہوا تھا جبکہ واشنگٹن حکومت نے ان کا جواب ایران کے خلاف مزید پابندیاں عائد کر کے دیا تھا۔

قاسم سلیمانی کی ہلاکت کے تناظر میں امریکی صدر ڈونلڈ ٹرمپ پر داخلی سطح پر دباؤ رہا ہے کہ انہوں نے سلیمانی کو مارنے کا حکم دے کر علاقائی صورتحال کو غیر مستحکم کرنے کی کوشش کی اور یہ کہ انہیں، خود ان کے بقول، جنرل سلیمانی کی وجہ سے لاحق 'شدید خطرات‘ کی وضاحت کرنا چاہیے۔

واشنگٹن حکومت عراق میں سینکڑوں امریکی فوجیوں کی ہلاکت کی ذمہ داری قاسم سلیمانی پر عائد کرتی ہے۔ ٹرمپ انتظامیہ کی جانب سے جنرل سلیمانی کے قتل کی وجوہات کے طور پر متضاد بیانات دیے جانے پر بھی تنقید کی جا رہی ہے۔

امریکی وزیر دفاع مارک ایسپر نے اتوار 12 جنوری کو کہا تھا کہ انہوں نے ایسا کوئی ثبوت نہیں دیکھا جس سے معلوم ہوتا ہو کہ ایران چار امریکی سفارت خانوں کو نشانہ بنانے کی منصوبہ بندی کر رہا تھا، حالانکہ امریکی صدر ٹرمپ نے اس سے دو روز قبل یہی دعویٰ کیا تھا۔

ڈی ڈبلیو کے ایڈیٹرز ہر صبح اپنی تازہ ترین خبریں اور چنیدہ رپورٹس اپنے پڑھنے والوں کو بھیجتے ہیں۔ آپ بھی یہاں کلک کر کے یہ نیوز لیٹر موصول کر سکتے ہیں۔

ا  ب ا / م م (ڈی پی اے)