وادی نیلم میں جیپ کھائی میں گرنے سے چودہ ہلاکتیں

جموں کشمیر کے منقسم خطے کے پاکستان کے زیر انتظام حصے میں مظفر آباد سے موصولہ رپورٹوں کے مطابق کھائی میں گر جانے والی جیپ پر  16 افراد سوار تھے اور یہ حادثہ سیاحتی حوالے سے بہت پرکشش  وادی نیلم میں پیش آیا۔

مقامی حکومتی اہلکار ندیم جنجوعہ نے بتایا کہ اس سانحے کے بعد امدادی کارکنوں نے کھائی میں سے ہلاک ہونے والے تمام 14 افراد کی لاشوں اور دونوں زخمیوں کو نکال لیا ہے۔ مرنے والوں کی لاشیں اور دونوں زخمی ایک مقامی ہسپتال میں منتقل کر دیے گئے ہیں تاہم ابھی تک یہ واضح نہیں کہ مسافروں سے بھری ہوئی یہ جیپ کس وجہ سے سڑک سے بہت نیچے کھائی میں جا گری۔

جموں کشمیر کا متنازعہ خطہ عشروں سے جنوبی ایشیا کی دو ہمسایہ لیکن حریف جوہری طاقتوں پاکستان اور بھارت کے درمیان منقسم ہے اور دونوں ہی اپنے اپنے طور پر اس پورے خطے کی ملکیت کے دعوے کرتے ہیں۔

بھارت کی طرح پاکستان میں بھی سڑکوں پر جان لیوا حادثات عام ہیں، جن کی بنیادی وجوہات سڑکوں کی ابتر حالت، ٹرانسپورٹ کے نظام کی خرابی اور ناکافی انفراسٹرکچر بھی ہیں اور ٹریفک قوانین اور سلامتی کے نظام کا ناقص نفاذ بھی۔

ابھی گزشتہ ماہ ہی پاکستان کے زیر انتظام کشمیر کے اسی ضلع میں ایک مسافر وین بھی دریا میں گر گئی تھی، جس کے نتیجے میں 16 افراد  ہلاک  ہو گئے تھے، جن میں سے زیادہ تعداد بچوں کی تھی۔

ک م/ م م (اے پی)