نفرتوں اور تشدد کی سیاہی میں ’’امن کے رنگ‘‘
آبادی کے لحاظ سے پاکستان کے سب سے بڑے اور بدامنی کے شکار شہر کراچی میں نوجوانوں کی ایک تنظیم امن ومحبت کا پیغام پھیلانے کے لیے سرگرم ہے۔
امید کی کرن
آبادی کے لحاظ سے پاکستان کے سب سے بڑے اور بدامنی کے شکار شہر کراچی میں نوجوانوں کی ایک تنظیم امن ومحبت کا پیغام پھیلانے کے لیے سرگرم ہے۔ پاکستان یوتھ الائنس نامی اس تنظیم نے اپنی کوششوں کا آغاز کراچی میں بدامنی کے لحاظ سے تین حساس ترین علاقوں لیاری، کورنگی اور سلطان آباد سے کیا ہے۔
امن کے رنگ
’امن کے رنگ‘ کے نام سے اس مہم کا مقصد نوجوانوں اور بچوں میں امن، تحمل، برداشت اور یگانگت پیدا کرنا ہے۔ منشیات، گینگ وار اور فرقہ واریت کے حوالے سے کراچی کے سب سے زیادہ متاثرہ علاقے لیاری میں لگایا گیا یہ کیمپ نوجوانوں کی توجہ کا مرکز ہے۔
فروغ امن کی کوشش
’امن کے رنگ‘ کے تحت لیاری، کورنگی اور سلطان آباد میں 17 ورک شاپس بھی منعقد کی جائیں گی۔ ان ورکشاپس میں 480 بچوں کو اس بات کی تربیت دی جائے گی کہ کس طرح یہ بچے اور نوجوان امن کے فروغ میں اپنا کردار ادا کر سکتے ہیں۔
مثبت سرگرمیوں اور تخلیقی صلاحیتوں کا فروغ
ان ورکشاپس میں بچوں اور نوجوانوں میں مثبت سرگرمیوں کی تربیت کے علاوہ تخلیقی صلاحیتوں کو اجاگر کرنے کی کوشش بھی کی جائے گی تاکہ وہ معاشرے میں کارآمد شہری کے طور پر اپنی خدمات انجام دے سکیں۔
آسان فہم اور دلچسپ
یہ ورک شاپس نصابی شکل میں نہیں ہوں گی بلکہ ان میں دلچسپ طریقوں اور سرگرمیوں کے ذریعے علاقے کے تنازعات اور مسائل کو موضوع بنایا جائے گا۔
ورکشاپس کے لیے رجسٹریشن
’امن کے رنگ‘ نامی اس مہم کے پہلے مرحلے میں لیاری، کورنگی اور سلطان آباد میں کیمپس لگا کر لوگوں کو امن و یگانگت کے لیے اپنا کردار ادا کرنے سے متعلق عوام کو آگاہ کیا گیا۔ اس کے ساتھ ساتھ مستقبل قریب میں ہونے والی ورکشاپس کے لیے نوجوانوں کی رجسٹریشن بھی کی گئی۔
اسکول نہ جانے والے بچے خصوصی توجہ
پاکستان یوتھ الائنس کے مطابق اس مہم میں ایسے بچوں کو خصوصی طور پر متوجہ کرنے کی کوشش کی جا رہی ہے جو کبھی اسکول نہیں گئے اور اپنا زیادہ تر وقت سڑکوں پر گزار دیتے ہیں جس کے باعث وہ منفی سرگرمیوں کی جانب مائل ہوجاتے ہیں۔
امن کے رنگ بکھیرنے کے لیے پُرعزم
لیاری میں اس مہم کے دوران نوجوانوں اور بچوں کے علاوہ بڑوں کی طرف سے بھی بہت دلچسپی دیکھنے میں آئی۔ امن و امان کی مخدوش صورتحال سے پریشان اس علاقے کے نوجوانوں اور بچوں کی بڑی تعداد خاص طور پر’امن کے رنگ‘ پھیلانے کے لیے پُر عزم نظر آئی۔
عمر، علاقائیت اور لسانی تفریق سے بالا
اس مہم میں خوش آئند بات یہ سامنے آئی کہ نہ صرف بچوں بلکہ ہر عمر کے افراد نے اپنے علاقے میں قیام امن کے لیے کی جانے والی اس کوشش کو سراہ رہے ہیں بلکہ نہایت دلچسپی سے اس میں حصہ لے رہے ہیں۔
علاقائی رضاکار
امن کے رنگ نامی اس مہم کا دورانیہ چھ ماہ ہے۔ اس منصوبے میں پاکستان یوتھ الائنس کے نوجوانوں کے علاوہ ایسے نوجوان رضاکار بھی شامل کیے گئے ہیں جن کا تعلق ان ہی علاقوں سے ہے جہاں یہ مہم جاری ہے۔
امن اور محبت کے خواہاں عوام
ان علاقوں کے بچوں، خواتین اور نوجوانوں کی بڑی تعداد کا جوش و خروش اس بات کی جانب اشارہ ہے کہ عوام میں حالات کی بہتری کے لیے اپنا کردار ادا کرنے اجتماعی کوششیں کرنے کا شعور بیدار ہو رہا ہے۔
سکیورٹی خدشات
پاکستان یوتھ الائنس کے مطابق اس مہم کے لیے کراچی کی انتظامیہ کی طرف سے باقاعدہ اجازت تو حاصل کی گئی ہے تاہم ان کے رضاکاروں کے لیے پولیس یا دیگر اداروں سے سکیورٹی نہیں مانگی گئی۔ اس کی ایک وجہ علاقے کے لوگوں کی طرف سے پرجوش خیر مقدم اور تعاون کا اظہار ہے۔