میکسیکو میں 'یومِ مردہ ' کی گیندے کے پھولوں کے ساتھ تیاری

میکسیکو سٹی کے قریب زوکچی ملکو کے پھول اگانے والے علاقے میں کاشت کار اور فیلڈ ورکرز ان دنوں خاص طور پر مصروف ہیں۔ دو نومبر کو ملک میں Dia de Muertos یعنی مُردوں کا دن منایا جائے گا۔ اس دن، شاندار میریگولڈ یا گیندے کے پھولوں سے ملک بھر میں گھروں، قبروں اور عبادت گاہوں کو سجایا جاتا ہے۔

مردوں کا دن کیتھولک-ہسپانوی اثرات کو مقامی آبائی ثقافت کے ساتھ جوڑتا ہے اور اسے سن 2008 میں یونیسکو کی غیر مادی ثقافتی ورثے کی نمائندہ فہرست میں شامل کیا گیا تھا۔ کہا جاتا ہے کہ اس دن مردوں کو میریگولڈ کی چمکیلی پیلی نارنجی پنکھڑیوں سے قبرستان سے اہل خانہ کے گھروں کا راستہ دکھتا ہے۔

گیندے کے پھولوں کو زوکچی ملکو کے کھیتوں سے نہروں کے راستے کشتیوں میں میکسیکو سٹی کے بازاروں تک پہنچایا جاتا ہے۔

مُردوں کے دن کی آمد سے ہفتوں پہلے ہی نہروں میں گہما گہمی شروع ہو جاتی ہے۔ پھولوں سے بھری ہوئی کشتیاں میکسیکو سٹی کے بازاروں کی جانب بڑھ رہی ہوتی ہیں جبکہ وہاں سے واپس آنے والی خالی کشتیاں تازہ پھولوں کو اٹھانے جاتی ہیں۔

"ہم نے اپنے آباؤ اجداد کے زمانے سے ہمیشہ گیندے کے پھولوں کو کاشت کیا ہے۔" پھولوں کے کاشتکار کرسٹوبل گارسیا نے خبر رساں ادارے روئٹرز کو مزید بتایا "کہا جاتا ہے کہ رنگوں اور خوشبوؤں کی وجہ سے ہمارے مردہ رشتہ دار ہم سے ملنے آتے ہیں۔"

میکسیکو کی پھولوں کی صنعت کو COVID-19 وبائی مرض نے سخت متاثر کیا ہے۔ اب توانائی اور کھاد کی قیمتوں کے ساتھ ساتھ پیداوار کی لاگت بھی بڑھ گئی ہے۔ تاہم میریگولڈ کے کسانوں کو یقین ہے کہ وہ اس سال فروخت میں اضافہ کر سکیں گے۔ وبائی مرض کے بعد پہلی بار، یومِ مردہ کی تقریبات ایک بار پھر عوامی سطح پر منعقد کی جا رہی ہیں۔

کورونا وبا کے دوران وائرس کے پھیلاؤ کو روکنے کے لیے 'مردوں کے دن' کی تقریبات سختی سے روک دی گئی تھیں۔ اہل خانہ کو سخت شرائط کے تحت ہی قبروں کو سجانے کی اجازت تھی۔ اس سال، میریگولڈز ایک بار پھر اپنی پوری شان و شوکت کے ساتھ نمائش کے لیے پیش ہوں گے۔ خاص طور پر ان لوگوں کے لیے جو اپنے مرنے والوں کو یاد کرنا چاہتے ہیں۔