میرکل چین کے دورے پر

جرمن خبر رساں ادارے ڈی پی اے کے مطابق ان کے دورے کی پہلی منزل چین کے جنوب مغربی صوبہ سیچوان کا دارالحکومت چینگ ڈو ہے۔ میرکل آج اتوار چھ جولائی کو جرمن کار ساز ادارے ’فوکس واگن‘ کے پلانٹ کا دورہ کریں گی اور وہاں کام کرنے والے جرمن کارکنوں کے بچوں سے ملاقات کریں گی۔

چینگ ڈو کے بعد وہ چینی دارالحکومت بیجنگ پہنچیں گی جہاں پیر سات جولائی کو ان کی چینی صدر شی جِن پِنگ اور وزیراعظم لی کیچیانگ سے ملاقاتیں ہوں گی۔

جرمن چانسلر انگیلا میرکل ایشیا کی معاشی طاقت چین کا دورہ کافی تواتر کے ساتھ کرتی رہتی ہیں۔ جرمن چانسلر بننے کے بعد یہ ان کا چین کا ساتواں دورہ ہے۔ ڈی پی اے کے مطابق میرکل یورپی رہنماؤں میں سے سب سے زیادہ چین کے دورے کر چکی ہیں۔

چین جرمن برآمدات کی ایک بڑی منڈی ہے جن میں کاریں بھی شامل ہیں جبکہ چین جرمنی کو عام استعمال کی چیزیں برآمد کرنے والے ایک اہم ملک کی حیثیت رکھتا ہے۔

جرمنی چین اور امریکا کے درمیان مصالحت کار کے طور پر بھی اہمیت اختیار کرتا جا رہا ہے کیونکہ چین کے ہمسایہ ممالک اس کی بڑھتی ہوئی طاقت پر تحفظات رکھتے ہیں۔

میڈیا اطلاعات کے مطابق چانسلر انگیلا میرکل کے دورے کے دوران مختلف کاروباری معاہدے بھی متوقع ہیں جن میں جرمنی کی لفتھانزا ایئر لائنز اور ایئر چائنہ کے درمیان معاہدہ بھی شامل ہے۔

جرمنی اور چین کے درمیان گزشتہ تین برسوں سے سالانہ تجارتی حجم 140 بلین یورو ہے۔ تاہم جرمن ٹریڈ آرگنائزیشن (GTAI) کے مطابق رواں برس کی پہلی سہ ماہی میں چین کے لیے جرمن برآمدات میں 9.8 فیصد اضافہ ہوا ہے۔

دوسری طرف جلاوطن ایغور نسل کے چینی باشندوں نے جرمن چانسلر انگیلا میرکل سے درخواست کی ہے کہ وہ اپنے دورہ چین کے دوران چینی صوبہ سنکیانگ کی مسلم اقلیت کے مستقبل کے معاملے پر بات کریں۔

ورلڈ ایغور کانگریس کی صدر ربیعہ قدیر نے ہفتہ پانچ جولائی کو جرمن چانسلر انگیلا میرکل کے نام ایک کُھلے خط میں کہا، ’’گزشتہ دو برسوں کے دوران چین کی جانب سے ملک کے مشرقی حصےمیں تشدد کے استعمال میں اضافہ ہوا ہے اور سخت طرز عمل سامنے آیا ہے۔‘‘

انسانی حقوق کی ایک تنظیم ’سوسائٹی آف تھریٹنڈ پیپلز‘ کے مطابق اقلیتی ایغور نسل کے مسلمانوں اور مقامی ہان نسل کے چینی باشندوں کے درمیان جھڑپوں میں 354 افراد ہلاک ہو چکے ہیں جبکہ 745 افراد کو گرفتار کیا گیا ہے۔‘‘

چینی حکام حالیہ مہینوں کے دوران ملک میں ہونے والے سلسلہ وار دہشت گردانہ حملوں کا ذمہ دار ایغور نسل کے مسلمانوں کو قرار دیتے ہیں۔ اطلاعات کے مطابق چینی حکومت کی طرف سے سینکڑوں افراد کو گرفتار کیا گیا ہے ان پر مقدمات قائم کیے گئے ہیں اور کئی افراد کو مبینہ طور پر سزائے موت بھی دی گئی ہے۔