میانمار میں سینکڑوں مسلمان بے گھر

کنبو میں یہ واقعات اس وقت پیش آئے ہیں جب پولیس نے ایک بدھ خاتون سے جنسی زیادتی کے الزام میں گرفتار ایک مسلمان کو بلوائیوں کے حوالے کرنے سے انکار کر دیا تھا۔ جس کے بعد ہزاروں بلوائیوں نے مسلمانوں کے گھروں کا گھیراؤ کیا اور انہیں نذرِ آتش کر دیا۔

ایک 40 سالہ مسلمان اونگ سان کا کہنا ہے، ’’ اپنے گھروں کو دوبارہ سے تعمیر کرنا بہت مشکل ہوگا۔ اس وقت لوگوں نے قریبی گھروں میں پناہ لے رکھی ہے یا وہ اپنے رشتہ داروں کے گھروں میں چلے گئے ہیں‘‘۔

مقامی عہدیدار نے خبر رساں ادارے اے ایف پی کو بتایا کہ 160 مرد اور 158 خواتین جن کے گھر جل چکے ہیں انہیں مقامی سکول میں پناہ دی گئی ہے۔

مسلمان میانمار کی آبادی کا چار فیصد ہیں جبکہ اکثریت بدھ مت کے پیروکاروں کی ہے۔ فسادات کی وجہ سے دونوں فرقے ایک دوسرے سے علیحدہ رہتے ہیں اور بہت سے روہنگیا مسلمان عارضی خیموں اور کیمپوں میں پناہ گزین ہیں۔ انسانی حقوق کی تنظیموں نے روہنگیا مسلمانوں کے قتل پر حکومت کی خاموشی کو تنقید کا نشانہ بنایا ہے۔

کنبو کے ایک مقامی فوٹوگرافر نے خبر رساں ادارے اے ایف پی کو بتایا کہ فسادات اتوار کی صبح ختم ہو گئے تھے جب کہ مکانات میں آگ اتوار کی شام تک لگی رہی اس کے ساتھ ساتھ علاقے میں پولیس کی اضافی نفری تعینات کر دی گئی ہے جبکہ 12 لوگوں کو گرفتار کر لیا گیا ہے۔

مقامی اخبار ’نیو لائٹ آف میانمار‘ نے آج لکھا ہے کہ پیر کی صبح صورت حال ٹھیک ہو چکی ہے اور حکام کی جانب سے بے گھر ہونے والے افراد کو کیمپوں میں منتقل کرنے کے انتظامات کیے جا رہے ہیں تا ہم واقع کے نتیجے میں کسی شخص کی ہلاکت یا زخمی ہونے کی اطلاعات موصول نہیں ہوئیں۔