مہاجرت پر نیا عالمی معاہدہ دنیا کے لیے ’خطرہ’ ہے، ہنگری

ہنگری کے وزیر خارجہ پیٹر سیارتو نے گلوبل مائیگریشن پر اقوام متحدہ کے نئے متفقہ معاہدے کو ’دنیا کے لیے خطرہ‘ قرار دیتے ہوئے کہا کہ یہ معاہدہ اُن کے ملک کے مفادات کے خلاف ہے۔

محفوظ، منظم اور باقاعدہ مہاجرت کے اس معاہدے کی دستاویز تیار ہونے میں اٹھارہ ماہ کا وقت لگا اور امریکا کے علاوہ عالمی ادارے کے ایک سو اکیانوے رکن ممالک نے گزشتہ جمعے اس کی منظوری دی تھی۔

امریکا اس معاہدے سے گزشتہ برس ہی یہ کہتے ہوئے باہر نکل گیا تھا کہ یہ معاہدہ امریکی امیگریشن اور مہاجرین کے حوالے سے پالیسیوں سے متصادم ہے۔

اقوام متحدہ کے اس معاہدے کا مقصد مہاجرت کے عمل کو منظم بنانے کے لیے ایک عالمی فریم ورک کا قیام ہے۔ اس معاہدے میں یہ شق بھی شامل کی گئی ہے مہاجرت کے مسئلے کا سامنا کرنے والے تمام فریق ممالک مشترکہ طور پر اس مسئلے کا حل تلاش کریں اور یہ کہ کوئی بھی ممبر ملک مہاجرت کے موضوع  پر تنہا فیصلہ نہیں کر سکتا۔

بوڈا پیسٹ میں ملکی کابینہ کے اجلاس کے بعد ہنگری کے وزیر خارجہ پیٹر سیارتو نے کہا،’’ یہ ایگریمنٹ ہنگری کے سلامتی اور مفادات کے خلاف ہے اور دنیا کے لیے اس لحاظ سے خطرہ ہے کہ اس سے  لاکھوں افراد مہاجرت کی طرف مائل ہو سکتے ہیں۔‘‘

سیارتو کا کہنا تھا کہ اقوام متحدہ کا یہ اقدام ’’ شدید متعصبانہ اور ترک وطن کے عمل کو سہولت فراہم کرنے والا ‘‘ ہے۔

ہنگری اس معاہدے پر دستخط ہونے کی تقریب میں شرکت نہیں کرے گا جو رواں برس دسمبر میں مراکش میں منعقد ہو گی۔ ہنگری کے وزیر اعظم وکٹر اوربان نے مہاجرین اور ترک وطن کے خلاف سخت پالیسی بنا رکھی ہے۔

اوربان یورپی یونین کی جانب سے مہاجرین کے بحران سے نمٹنے کے لیے ایک متفقہ حکمت عملی قائم کرنے کی راہ میں رکاوٹ سمجھے جاتے ہیں۔ وہ یورپی یونین کے رکن ممالک میں مہاجرین کی کوٹے کے مطابق تقسیم کے بھی سخت خلاف ہیں۔ 

ص ح / ع ت / نیوز ایجنسی