مودی کا سوشل میڈیا خواتین کے حوالے

وزیر اعظم مودی نے پیر کی شب ٹوئٹر پر سوشل میڈیا چھوڑنے کا عندیہ دیا، جس سے بھارتی میڈیا میں تہلکہ مچ گیا۔ انہوں نے لکھا:

''سو چ رہا ہوں کہ اتوار سے اپنے تمام سوشل میڈیا چھوڑ دوں، جس میں فیس بک، ٹوئٹر، انسٹا گرام اور یو ٹیوب شامل ہے۔ اس حوالے سے میں آ پ کو جلد آگاہ کروں گا۔''

وزیر اعظم کے اعلان کے فوری بعد ٹوئٹر پر  'نو سر' اور 'پلیز سر'  ٹرینڈ کرنے لگا۔

تاہم  منگل کو انہوں نے ایک اور ٹوئٹ میں واضح کیا کہ اتوار کو یوم خواتین کے موقع پر وہ اپنے سوشل میڈیا اکاؤنٹ ایسی خواتین کو سونپ دیں گے جن کی زندگی  ہمت اور حوصلے کی مثال ہیں۔

انہوں نے لکھا: ''کیا آپ اس طرح کی خاتون ہیں یا آپ ایسی کسی حوصلہ بڑھانے والی خاتون کو جانتے ہیں؟  'شی انسپائرس اس' کے ساتھ ہمیں ایسی خواتین کے بارے میں بتائیے۔''

وزیر اعظم مودی کے اس تازہ ٹوئیٹ کے آدھے گھنٹے کے اندر ہی 'شی انسپائرس اس'  بھارت کا ٹاپ ٹرینڈ بن گیا۔

مودی کے پہلے ٹوئٹ کی طرح دوسرے ٹوئٹ پر بھی لوگ طرح طرح کی رائے دے رہے ہیں۔

کانگریس کی رہنما رادھیکا کھیڑا نے کہا کہ ''جناب وزیر اعظم یہ ڈرامہ کرنے سے اچھا ہے کہ اس یوم خواتین پر آپ خواتین کو ان فالو کردیں۔''

 روی شنکر نامی ایک صاحب نے لکھا، ''بہت بہتر فیصلہ ہے۔ برائے مہربانی سوشل میڈیا پر برقرار رہیں۔''

بیشتر لوگوں کا کہنا ہے کہ وزیر اعظم نے پیر کی رات جو ٹوئٹ کیا تھا اس کا مقصد بھارت کو درپیش سنگین اور اصل مسائل سے لوگوں کی توجہ ہٹانا تھا۔

دہلی میں ہونے والے فسادات کی وجہ سے مودی حکومت کا امیج متاثر ہورہا ہے۔ تجزیہ کاروں کے مطابق چند گھنٹے کے لیے ہی سہی لیکن وہ اس مقصد میں کامیاب دکھائی دیے کیونکہ بھارتی میڈیا میں مودی کا ٹوئیٹ چھایا رہا۔

بھارتی وزیر اعظم نریندر مودی سوشل میڈیا پر کافی مقبول اور سرگرم ہیںاور امریکی صدر ڈونلڈٹرمپ کے بعد ٹوئٹر پر سب سے زیادہ فالو کیے جانے والے لیڈر ہیں۔ ٹوئٹر پر وزیر اعظم مودی کے پانچ کروڑ 33 لاکھ فالوورز ہیں۔ جبکہ فیس بک پر ان کے 4کروڑ چار لاکھ اور انسٹاگرام پر تین کروڑ 52 لاکھ فالوورز ہیں۔