ملائیشیا میں بالی وڈ کے ستاروں کی تقریب
اس مرتبہ ’انٹرنیشنل انڈین فلم اکیڈمی‘ کے ایوارڈز کی سالانہ تقریب کا اہتمام ملائیشیا کے دارالحکومت کوالالمپور میں کیا گیا، جہاں اتوار کی رات بالی وڈ کے ستاروں نے اپنی پرفارمنس اور اداؤں سے مداحوں کے دل جیت لیے۔
ہرتیک روشن کی پرفارمنس
کوالالمپور کے پُترا اِنڈور اسٹیڈیم میں منعقد کی گئی اس تقریب میں بالی ووڈ فلمی صنعت سے تعلق رکھنے والے معروف و مقبول اداکاروں اور اداکاراؤں نے رقص بھی کیا اور اپنی دلکش گفتگو اور مزاح سے محفل کو کشت زعفران بھی بناتے رہے۔ اس تصویر میں معروف اداکار ہرتیک روشن اسٹیج پر جلوہ افروز ہیں۔
مزاح بھی اور رقص بھی
چمکتی دمکتی روشنیوں اور قمقموں سے فضا منور رہی اور چار ہزار کے قریب تماشائی اس ماحول سے بھرپور انداز میں لطف اندوز ہوئے۔ اس تقریب کی میزبانی کے فرائض رنبیر کپور اور ارجن کپور نے انجام دیے، جن کے عمدہ مکالموں اور مزاح کی بدولت اس تقریب میں چار چاند لگ گئے۔
بپاشا باسو کی شرکت
اس تقریب میں بھارتی فلم انڈسٹری میں اپنے بے باک کرداروں کی وجہ سے شہرت حاصل کرنے والی اداکارہ بپاشا باسو نے بھی شرکت کی۔ ایک ایونٹ کے دوران وہ صحافیوں سے گفتگو میں مصروف ہیں۔
بہترین اداکار، شاہد کپور
’انٹرنیشنل انڈین فلم اکیڈمی‘ کے ایوارڈز کی سالانہ تقریب میں بہترین اداکار کے طور پر شاہد کپور کو چنا گیا، جنہوں نے فلم ’حیدر‘ میں اپنے کیریئر کی شاندار کارکردگی کا مظاہرہ کیا ہے۔
کنگنا راناوت کا اعزاز
بہترین اداکارہ کا انعام کنگنا راناوت کو ملا، جو فلم ’کوئین‘ میں کسی حقیقی ملکہ سے کم نظر نہیں آتیں۔
ستارے دیکھنے کو بے قرار
اس تقریب انعامات میں انوشکا شرما، ہرتیک روشن، شاہد کپور، سوناکشی سنہا، ٹائیگر شروف اور کئی دیگر مایہ ناز اداکار بھی موجود تھے۔ انوشکا شرما، پرینکا چوپڑا اور فرحان خان تقریب میں شرکت کے لیے ہال میں جا رہے ہیں۔
سوناکشی سنہا سیاہ لباس میں
سولہویں آئفا ایوارڈز کی تقریب میں شریک بھارتی اداکارہ سوناکشی سنہا۔ معروف اداکاری شتروگن سنہا کی بیٹی سوناکشی نے بھارتی فلم انڈسٹری میں نیا رنگ بھرا ہے۔ وہ بھی اس ملائیشیا میں منعقدہ اس تقریب میں شریک ہوئیں۔
انیل کپور کی آمد
انٹرنیشنل انڈین فلم اکیڈمی‘ کے آئفا ایوارڈ کو بالی وڈ کے ’آسکر ایوارڈز‘ کے طور پر بھی جانا جاتا ہے۔ بھارتی فلم انڈسٹری کی تشہیر اور مقبولیت میں اضافہ کرنے کے مقصد سے یہ تقریب انعامات ہر سال مختلف ممالک میں منعقد کی جاتی ہے۔ اس مرتبہ ملائشییا میں اس تقریب کی تشہیر کے لیے انیل کپور بھی وہاں موجود تھے۔
پرینیکا چوپڑا کا انداز
جس طرح بھارتی فلمیں بنائی جا رہی ہیں، ان میں گلیمر، بہترین میوزک اور عمدہ رقص دنیا بھر کے لوگوں کو اپنی طرف متوجہ کرنے میں کامیاب ہوا ہے۔ ان فلموں میں اب یورپی ملکوں کے علاوہ چین اور جاپان جیسے ممالک کے عوام بھی انتہائی زیادہ دلچپسی لینے لگے ہیں۔ گزشتہ برس یہ تقریب امریکا میں منعقد کی گئی تھی۔
میزبانوں کا آئٹم
اتوار کی رات بہترین فلم کا ایوارڈ وکاس بھل کی فلم ’کوئین‘ کو دیا گیا جبکہ فلم ’پی کے‘ پر بہترین ہدایتکار کا انعام راجکمار ہیرانی کے حصے میں آیا۔ اس رنگا رنگ تقریب کو دیکھنے کے لیے ہال میں موجود شرکاء نے مختلف پرفارمرز کو دل کھول کر داد بھی دی۔
ہریتک روش کا نیا انداز
بھارتی فلمی ستاروں کی ایک بڑی تعداد ہر سال اس تقریب انعامات میں شریک ہوتی ہے۔ یہ تقریب بھارت کا سب سے بڑا میڈیا ایونٹ ہے، جسے دنیا بھر میں آٹھ سو ملین افراد دیکھتے ہیں۔ ہر سال اس تقریب میں شاندار ڈانس پرفارمنسز بھی دی جاتی ہیں۔