لبنان میں شام جانے والا اسلحہ پکڑا گیا

بتایا گیا ہے کہ سیئرا لیون کے جھنڈے والے اس بحری جہاز نے لیبیا میں طرابلس کی بندرگاہ میں داخلے کا پرمٹ حاصل کر رکھا تھا۔ شبے کی بنیاد پر اسے راستے ہی میں روک کر لبنان میں صیلاتا کے ساحل پر کھڑا کر دیا گیا۔ اے ایف پی نے عینی شاہدین کے حوالے سے بتایا کہ ضبط کیے گئے اسلحے کو فوجی گاڑیوں میں دارالحکومت بیروت منتقل کر دیا گیا ہے۔ جہاز کے کپتان اور دیگر عملے کو مزید پوچھ گچھ کے لیے فوج کے محکمہء انٹیلی جنس کے حوالے کر دیا گیا ہے۔

عرب ریاست شام کی صورتحال بدستور عالمی میڈیا کی بھرپور توجہ کا مرکز بنی ہوئی ہے۔ دمشق سے موصولہ اطلاعات کے مطابق بحیرہ روم پر شامی فوج کی ایک ساحلی پوسٹ پر مسلح دہشت گردوں نے حملہ کیا، جس کے باعث ایک سکیورٹی اہلکار ہلاک ہوا۔ یہ واقعہ جمعے اور ہفتے کی درمیانی شب پیش آیا۔

شامی سرکاری خبر رساں ادارے SANA کے مطابق بحریہ کے اہلکاروں نے حملہ آور کشتی کو فرار پر مجبور کر دیا۔ شامی حکام اس سے قبل الزام عائد کرتے رہے ہیں کہ حکومت مخالف مسلح باغی ترکی اور لبنان سے خشکی کے راستے شام میں داخل ہو کر کارروائیاں کر رہے ہیں۔ اب پہلی بار ایسا ہوا ہے کہ مسلح افراد نے سمندر کے راستے شامی فورسز کو نشانہ بنایا ہے۔

شام میں صدر بشار الاسد کے خلاف گزشتہ قریب 13 ماہ سے مزاحمت کا سلسلہ جاری ہے، جس کے جواب میں سکیورٹی فورسز ایکشن میں ہیں۔ اس عرصے میں اقوام متحدہ کے اندازوں کے مطابق قریب نو ہزار افراد ہلاک ہو چکے ہیں۔ اقوام متحدہ کے سیکرٹری جنرل بان کی مون نے شامی حکومت کو مورد الزام ٹھرایا ہے کہ وہ شہروں سے بھاری اسلحہ اور فوج واپس بلانے میں ناکام ثابت ہو رہی ہے۔

 اقوام متحدہ کے سیکرٹری جنرل  نے اپنے بیان میں کہا تھا کہ شامی فورسز کا کریک ڈاؤن ناقابل برداشت مرحلے میں داخل ہو چکا ہے۔ شام میں حکومت کے زیر اثر اخبارات نے اقوام متحدہ کے سیکرٹری جنرل بان کی مون پر الزام عائد کیا ہے کہ ان کے بیان سے حکومت کے مسلح مخالفین کو شہ ملی ہے۔ شام کے لیے اقوام متحدہ کے خصوصی مندوب کوفی عنان کے تجویز کردہ فائر بندی معاہدے کے بعد یہ شام کی جانب سے اقوام متحدہ پر کڑی ترین تنقید ہے۔