فرانس کتنا حسین ہے؟ ذرا ان تصویروں سے پوچھیے
چودہ جولائی کو فرانس میں قومی دن کا جشن منایا جاتا ہے۔ سن 1789 میں اسی دن اہل فرانس نے باستیل کے جیل خانے کو منہدم کر دیا تھا اور یوں انقلاب فرانس کا آغاز ہوا تھا۔ آئیے فرانس کے حسن پر ایک نظر ڈالیں۔
پیرس
پیرس کے مشور عالم عجائب گھر لُوور میں مونا لیزا کی پینٹنگ کو سراہتے اور ایفل ٹاور سے فرانسیسی دارالحکومت کا نظارہ کرتے سیاح عجب سی خوشی کے عالم میں ہوتے ہیں۔ پیرس اپنے سیاحوں کو بے شمار قابل دید مقامات کے نظاروں کی دعوت دیتا ہے۔
پرووانس
لیونڈر کے خوشبو دار کھیتوں، قرون وسطی کے پہاڑی دیہاتوں، چمکتی دھوپ اور ایک خاص روشنی ۔ یہ ہے فرانس کے خوبصورت مقام پرووانس کی تعریف۔ پکاسو اور شیگل جیسے آرٹسٹ یہاں کے حسن سے اتنے متاثر ہوئے کہ یہیں رہ گئے۔
کوٹ دا زیور
سورج کی دھیمی دھیمی حرارت سینکنے کی خواہش فرانس میں بہت سے لوگوں کو بحیرہ روم کے اس ساحل تک لے آتی ہے۔ کوٹ دا زیور کو عیش و عشرت اور گلیمر کے لیے جانا جاتا ہے۔
دی الپس
الپس جنوب مشرقی فرانسیسی سرحدی علاقے میں واقع ہے۔ مونٹ بلانک ماسییف پہاڑی سلسلہ دنیا بھر سے سیاحوں کو اپنی طرف کھینچتا ہے۔
پیرے نیز
پیرے نیز کا علاقہ فرانس کے جنوب مغرب میں سپین کی سرحد کے ساتھ ساتھ واقع ہے۔ یہ ہائیکنگ کرنے والوں کے لیے خاص دلچسپی کا حامل ہے۔ کہتے ہیں کہ جو یہاں بائیسکل چلا لے وہ صحیح معنوں میں تندرست تصور کیا جاتا ہے۔
لوئر کی ادی
لوئر فرانس کا سب سے طویل دریا ہے۔ ماسف سینٹرل سے اٹلانٹک تک اس کی لمبائی ایک ہزار بیس کلومیٹر ہے۔ یورپ میں کہیں بھی آپ کو اتنے چھوٹے رقبے میں اتنے زیادہ قلعے نہیں ملیں گے۔ ان میں سے ایک تصویر میں دکھائی دینے والا ’شیتو دا شیمبو‘ نامی یہ معروف قلعہ بھی ہے۔
برتھانے
فرانس کے مغرب میں برتھانے کا ساحل جنگلی حسن سے مالامال ہے۔ ہمیشہ بدلتے رہنے والا موسم اس علاقے کی خوبصورتی کو مزید متاثر کن بنا دیتا ہے۔ برتھانے فرانس میں دوسرا سب سے زیادہ دیکھا جانے والا تفریحی مقام ہے۔
نورمُن ڈی
یورپ بھر میں سب سے طاقتور لہریں ناورمنڈی میں دیکھی جاتی ہیں۔ ہر سال چند بار یہ جزیرہ پانی سے مکمل طور پر بھر جاتا ہے۔ یہاں قائم مونٹ سینٹ مائیکل فرانس میں سیاحوں کے لیے سب سے زیادہ دلچسپی کا باعث ہوتا ہے۔
کوٹ درژاں
اس فرانسیسی لفظ کا مطلب ہے ’ چاندی کا ساحل‘ جو بورڈاؤ کے مغرب میں واقع اٹلانٹک کوسٹ کو کہا جاتا ہے۔ سورج کی روشنی میں چمکتی ساحل کی ریت یہاں آنے والوں کے لیے خواب جیسا سماں پیدا کرتی ہے۔
خوشگوار شراب کے لیے انگور کے باغات
فرانس میں اعلی معیار کی شراب تیار کی جاتی ہے جو عالمی سطح پر بہت مقبول ہے۔ فرانس میں وائن بنانے کے چودہ مقامات ہیں اور ان میں سے ہر ایک اپنی انفرادیت رکھتا ہے۔
ہر جگہ لذیذ کھانا
فرانس کا ’الزس‘ علاقہ اپنے علاقائی کھانوں کی وجہ سے مشہور ہے اور کھانے کے شائقین یہاں جوق در جوق چلے آتے ہیں۔ یہاں کھانا زیادہ مہنگا بھی نہیں اور مقدار میں بھی اچھا خاصا ہوتا ہے۔ سو ہر کسی کو اپنی جیب اور ذائقے کے مطابق کچھ نہ کچھ مل ہی جا تا ہے۔