عراق کے لیے امدادی اجلاس، اربوں ڈالر کی اپیل

اس اجلاس کے افتتاح کے موقع پر منصوبہ بندی کے عراقی وزیر سلمان الجمیلی نے کہا کہ جنگ کی تباہ کاریوں کی وجہ سے عراق کو اپنے ہاں بنیادی ڈھانچے کی تعمیر نو کے لیے کم از کم بھی اٹھاسی ارب ڈالر کی ضرورت ہے۔ فرانسیسی وزیر خارجہ ژاں ایو لےدریاں نے بھی اس تناظر میں کہا، ’’میں یہاں (کویت) آپ سے یہ کہنے آیا ہوں کہ فرانس آپ کے ساتھ ہے اور ہم ہمیشہ ساتھ رہیں گے۔ ہم یہاں جنگ میں اتحادی کے طور پر موجود تھے اور اب ہم تعمیر نو میں بھی اتحادی کا کردار ادا کریں گے۔‘‘ 2017ء میں بھی فرانس نے عراق کو پانچ سو ملین سے زائد کی رقم ادھار دی تھی۔  لےدریاں آج پیر کو شمالی عراق میں کردستان کا بھی دورہ کریں گے۔

’عراق کو داعش سے مکمل طور پر آزاد کرا لیا گیا‘

’چین عراق میں آئل ریفائنری لگائے گا‘

اس تین روزہ اجلاس کا مقصد ’اسلامک اسٹیٹ‘ کے خلاف جنگ میں کامیابی کے بعد عراق کے تباہ شدہ علاقوں کی دوبارہ تعمیر کے لیے مالی وسائل جمع کرنا ہے۔ ’اسلامک اسٹیٹ‘ نے 2014ء سے عراق کے متعدد علاقوں پر قبضہ کیا ہوا تھا، جن میں موصل، تکریت، رمادی اور فلوجہ جیسے اہم اور بڑے شہر بھی شامل تھے۔ ابھی گزشتہ برس دسمبر میں ہی عراقی وزیر اعظم حیدر العبادی نے ’اسلامک اسٹیٹ‘ کو مکمل طور پر پسپا کر دینے کا اعلان کیا تھا۔

عراقی وزارت منصوبہ بندی کے ایک اعلٰی اہلکار نے بتایا کہ تعمیر نو کے لیے فوری طور پر بائیس ارب ڈالر درکار ہیں۔ اسی دوران اس اجلاس میں شریک غیر سرکاری تنظیموں نے عالمی برادری سے عراق میں انسانی بنیادوں پر امداد کے لیے فوری طور پر 330 ملین یورو مہیا کرنے کا مطالبہ کیا ہے۔