عراق ميں اغواء ہونے والے بھارتی شہريوں کی ہلاکت کی تصديق

بھارتی پارلیمان سے خطاب کرتے ہوئے ملکی وزیر خارجہ سشما سوراج نے کہا کہ ان افراد کی لاشیں ایک اجتماعی قبر سے ملی ہیں اور ڈی این ٹیسٹ بھی یہ ثابت کرتے ہیں کہ یہ وہی بھارتی شہری ہیں، جو عراق کے شہر موصل سے لاپتہ ہو گئے تھے۔ وزیر خارجہ نے کہا،’’ میں ثبوت کے بنیاد پر کہتی ہوں کہ 39 افراد ہلاک ہو چکے ہیں۔‘‘ نئی دہلی حکومت کا کافی عرصے سے يہ موقف رہا ہے کہ جب تک اس کے پاس ثبوت نہیں ہوں گے، تب تک ان افراد کو مردہ قرار نہیں دیا جاسکتا۔

سوراج نے پارلیمان کو بتایا کہ بغداد کی انتظامیہ نے زمین میں زیادہ گہرائی تک جانے والے رڈار کے ذریعے اجتماعی قبر کی نشاندہی کی تھی، جہاں سے ان بھارتی شہریوں کی لاشیں ملی ہیں۔ پارلیمان میں حزب اختلاف کے ارکان اور ہلاک شدگان کے اہل خانہ نے کہا کہ کافی عرصے تک حکومت نے انہیں اندھیرے میں رکھا۔ کانگريس پارٹی کے رکن ششی تہور نے ایک ٹوئٹ میں لکھا،’’ حکومت نے عوام کو کیوں جھوٹی تسلیاں دیں کہ ساڑھے تین سال بعد بھی یہ لوگ زندہ تھے؟‘‘

 تین برس قبل ان افراد کو عسکریت پسندوں نے موصل شہر سے اغوا کیا تھا۔ بتایا گیا ہے کہ یہ تمام افراد ایک تعمیراتی کمپنی کے ملازم تھے۔ سشما سوراج نے بتایا کہ ان افراد کو قتل کرنے کے بعد دفن کر دیا گیا تھا۔

ب ج/ع س، روئٹرز، اے ایف پی