عراقی بحران کی وجہ وزیراعظم المالکی کی ’فرقہ ورانہ پالیسیاں‘ ہیں، امریکی حکام

خبر رساں ادارے اے ایف پی کے مطابق عراق میں سنی شدت پسند تنظیم اسلامک اسٹیٹ اِن عراق اینڈ شام کی جانب سے کئی اہم عراقی شہروں پر قبضے کو عراق کی سالمیت اور وجود کے لیے خطرہ قرار دیا جا رہا ہے۔ اس عسکری تنظیم کی پیش قدمیوں کو اقوام متحدہ نے خطرناک قرار دیتے ہوئے انہیں عراق کے لیے ’زندگی اور موت کا معاملہ‘ قرار دیا ہے۔

گزشتہ روز عراقی حکومت کی جانب سے امریکا سے باقاعدہ درخواست کی گئی تھی کہ وہ شدت پسندوں کے خلاف فضائی حملے کرے، تاہم ابھی تک امریکی حکومت نے اس سلسلے میں کوئی فیصلہ نہیں کیا ہے۔ امریکی حکام کا کہنا ہے کہ فضائی حملوں کی راہ میں سب سے بڑی رکاوٹ اہداف کے حوالے سے درست خفیہ معلومات کی عدم دستیابی ہے اور دوسری صورت میں عام شہریوں کی ہلاکتوں کے واقعات پیش آ سکتے ہیں۔

امریکی حکام عراقی صورتحال کی وجہ وزیراعظم نوری المالکی کی پالیسیوں کو قرار دیتے ہوئے انہیں ملک کی سنی اقلیت کے ساتھ ہونے والی مسلسل تفریق کا نتیجہ قرار دے رہے ہیں۔

امریکی نائب صدر جوبائیڈن نے بھی جمعرات کے روز اسی تناظر میں کہا کہ وزیراعظم نوری المالکی کو صرف شیعہ شہریوں کی بجائے تمام عراقیوں کا رہنما ہونا چاہیے۔

انہوں نے نوری المالکی سے ٹیلی فون پر بات چیت میں زور دیا کہ عراق کی بقا اور سالمیت کے لیے ضروری ہے کہ وہاں تمام باشندوں کے حقوق کا خیال رکھا جائے اور انہیں معاشرتی دھارے میں شامل کیا جائے۔

امریکا کے اعلیٰ ترین فوجی عہدیدار جنرل مارٹن ڈیمپسی نے بھی عراقی حکومت پر فرقہ واریت کی جڑوں کو مضبوط کرنے کا الزام عائد کیا ہے۔ ان کا کہنا تھا کہ بغداد حکومت عوام کو جوڑنے میں مکمل طور پر ناکام رہی۔

سابق امریکی فوجی کمانڈر جنرل ڈیوڈ پیٹریاس نے بھی موجودہ صورتحال کی ذمہ داری نوری المالکی پر عائد کی۔ جنرل پیٹریاس نے لندن میں ایک کانفرنس سے خطاب میں کہا، ’امریکی فضائیہ کو عراقی شیعہ ملیشیا کی فضائیہ نہیں بن جانا چاہیے۔‘ انہوں نے کہا کہ اگر عراق میں تمام فرقوں سے تعلق رکھنے والوں کے درمیان سیاسی مفاہمت نہیں ہوتی، تو اس بحران میں کسی ایک فریق کی حمایت سے فرقہ ورانہ خلیج اور بڑھ جائے گی۔

دریں اثناء عینی شاہدین کے مطابق ملک کی سب سے بڑی آئل ریفائنری پر قابض سنی شدت پسند گروپ اسلامک اسٹیٹ اِن عراق اور شام کے جنگجوؤں نے اس ریفائنری پر اپنے سیاہ جھنڈے لگا دیے ہیں۔ تاہم حکومتی عہدیداروں کا کہنا ہے کہ بیجی کے علاقے میں قائم اس آئل ریفائنری پر ابھی تک سرکاری فورسز کا قبضہ ہے۔ خیال رہے کہ بیجی شمالی عراق میں واقع دو لاکھ آبادی کا شہر ہے اور یہ دارالحکومت بغداد سے تقریباﹰ 250 کلومیٹر دور ہے۔

دوسری جانب ترک وزیراعظم رجب طیب ایردوآن نے خبردار کیا ہے کہ عراق میں عسکریت پسندوں کے خلاف فضائی حملوں میں بڑی تعداد میں عام شہری ہلاک ہو سکتے ہیں۔ واضح رہے کہ نیٹو کے رکن ممالک میں ترکی امریکا کے بعد سب سے زیادہ مسلح افواج کا حامل ملک ہے۔ ترکی ہی میں انچِرلِک کے علاقے میں امریکی فضائیہ کا اہم اڈہ ہے۔ انہوں نے کہا کہ عسکریت پسند عام شہریوں میں گھل مل چکے ہیں اور فضائی حملوں کی صورت میں عام شہریوں کی جانوں کو شدید خطرہ ہو گا۔