طالبان کے خلاف افغان فوج کا بڑا آپریشن شروع

افغان صوبے کنڑ کی پولیس کے سربراہ عبدالحبیب سید خیلی نے نیوز ایجنسی ڈی پی اے کو بتایا کہ مشرقی علاقے میں سرگرم طالبان عسکریت پسندوں کے خلاف ایک وسیع آپریشن کا آغاز کیا گیا ہے اور اِس میں خاص طور پر فوج اور دوسری سکیورٹی فورسز کا فوکس دانگام کا ضلع ہے۔

یہ امر اہم ہے کہ اسی ضلع میں تقریباً گیارہ دِن قبل قبل مقامی افراد پر مشتمل مسلح ملیشیا اور پاکستانی طالبان کے درمیان چپقلش پیدا ہوئی تھی۔ اسی علاقے میں مقامی افراد پاکستانی طالبان کی بیدخلی کا مطالبہ کر رہے ہیں۔ ابتدائی اطلاعات کے مطابق آپریشن کے پہلے روز کم از کم 22 عسکریت پسندوں کو ہلاک اور دیگر 30 کو زخمی کرنے کا دعویٰ کیا گیا ہے۔

افغانستان کے مشرقی حصے میں آپریشن میں شریک فوج کے ترجمان نعمان عَطفی کا کہنا ہے کہ طالبان کے خلاف پیر کے روز شروع ہونے والے اس آپریشن میں فوج کو انتہائی بڑی کامیابی حاصل ہوئی ہے۔ کنڑ صوبہ پاکستانی سرحد کے ساتھ جڑا ہوا ہے اور پاکستانی سکیورٹی اداروں کے مطابق پاکستانی طالبان کا سربراہ ملا فضل اُللہ اِسی صوبے میں اپنے حواریوں کے ساتھ کسی کمین گاہ میں ڈیرا لگائے ہوئے ہے اور اپنے اِسی مقام سے پاکستانی قبائلی علاقوں میں طالبان کی قیادت کر رہا ہے۔ دانگام کا ضلع برسوں سے پاکستانی طالبان کی پسندیدہ پناہ گاہ رہا ہے۔

پاکستانی شمال مغربی سرحدی صوبے خیبر پختونخوا کے مرکزی پشاور میں ایک اسکول پر طالبان کے حملے کے اگلے روز پاکستانی فوج کے سربراہ جنرل راحیل شریف کابل پہنچ کر افغان صدر اشرف غنی سے ملے تھے۔ اِس ملاقات میں پاکستانی فوج کے سربراہ نے افغان صدر سے طالبان کو شکست دینے کی حمایت طلب کی تھی۔ اِسی ملاقات کے تناظر میں بعض تجزیہ کاروں کا خیال ہے کہ پاکستانی طالبان کے سربراہ ملا فضل اُللہ کی پناہ گاہ کی سمت بڑے آپریشن کا آغاز کیا گیا ہے۔ پاکستان کئی مرتبہ ملا فضل اُللہ کی حوالگی کا مطالبہ کر چکا ہے۔

افغان وزارت دفاع کے نائب ترجمان دولت وزیری کا کہنا ہے کہ افغان فوج نے صوبے کنڑ کے ضلعے دانگام پر کئی سمتوں سے مشترکہ آپریشن شروع کیا ہے تا کہ جنگجُوؤں کو فرار کا موقع نہ مل سکے۔ دولت وزیری نے مشترکہ فوجی آپریشن میں شریک دوسری مسلح قوتوں کی تفصیل نہیں بتائی ہے۔

کنڑ صوبے کے گورنر شجاع اُلملک جلالا نے بتایا ہے کہ پندرہ سو افغان طالبان جنگجُوؤں نے دانگام کے بعض اضلاع پر حملے بھی شروع کر رکھے ہیں۔ جلالہ کے مطابق پاکستانی طالبان اور لشکر طیبہ کے عسکریت پسند بھی دانگام میں افغان سکیورٹی کے ساتھ مسلح محاذ آرائی میں شریک ہیں۔