طاقتور سابق چینی پولیس چیف اب خود کٹہرے میں

52 سالہ وانگ لی جُن کے انکشافات کے نتیجے میں چین کے ابھرتے ہوئے سیاستدان بو ژیلائی کا سیاسی کیریئر اختتام کو پہنچ چکا ہے جبکہ بو کی اہلیہ کو ایک برطانوی بزنس مین نِیل ہے وُڈ کو قتل کرنے کے الزام میں مقدمے کا سامنا کرنا پڑا اور اُسے سزا بھی سنائی جا چکی ہے۔

چینی ٹیلی وژن پر شہر چونگ کِنگ کے طاقتور اور سابق پولیس چیف وانگ لی کو کٹہرے میں کھڑے دکھایا گیا۔ استغاثہ نے وانگ پر رشوت ستانی کے ساتھ ساتھ یہ الزام بھی عائد کیا کہ اُس نے اپنے طاقتور باس بو ژیلائی کی اہلیہ گُو کائیلائی کو سزا سے بچانے کے لیے برطانوی بزنس مین کے قتل پر پردہ ڈالنے کی کوشش کی تھی۔

وانگ لی جُن کے انکشافات کا نتیجہ گزشتہ چند دہائیوں کے سب سے بڑے سیاسی اسکینڈل کی صورت میں سامنے آیا تھا۔ بو ژیلائی، جو پہلے کمیونسٹ پارٹی کےاندرونی قیادتی مرکز میں جگہ پانے کی امید کر رہے تھے، اس اسکینڈل کے بعد سیاسی زوال کا شکار ہو گئے۔

ایسا لگ رہا تھا کہ یہ اسکینڈل اس سال موسم خزاں میں پارٹی قیادت میں مجوزہ تبدیلی پر بھی منفی اثرات مرتب کرے گا۔ اٹھارویں پارٹی کانگریس کے انعقاد سے چند ہفتے قبل اس مقدمے کی تکمیل یہ ظاہر کرتی ہے کہ سیاسی اعتبار سے یہ مقدمہ کتنا نازک تھا۔ اس حوالے سے Tsinghua یونیورسٹی سے وابستہ سیاسی امور کے ماہر Wu Qiang کہتے ہیں:’’یہ بات ناقابل تصور ہے کہ پارٹی کانگریس وانگ لی جُن کے مقدمے کی سماعت مکمل ہونے سے پہلے منعقد ہونے کی صورت میں کامیابی سے ہمکنار ہو۔ پہلے اس مقدمے کے نیچے سیاسی طور پر خط تنسیخ پھیرنا اور عدالتی طور پر اس کا خاتمہ ضروری ہے۔ یہ ایک طرح کی سیاسی سودے بازی ہے تاکہ بو ژیلائی یا دیگر سرکردہ سیاستدانوں کو مزید اس مقدمے میں ملوث نہ کیا جا سکے۔‘‘

ابھی یہ واضح نہیں ہے کہ وانگ لی جُن کے خلاف مقدمے کا فیصلہ کب سنایا جائے گا۔ آیا خود بو ژیلائی کو بھی قتل کی سازش کا علم تھا، ابھی یہ بات بھی غیر واضح ہے۔ کوئی نہیں کہہ سکتا کہ بو ژیلائی کا مستقبل کیا ہو گا۔ استغاثہ تو نہیں البتہ پارٹی کی جانب سے بو کے خلاف ڈسپلن کی سنگین خلاف ورزی کے الزام میں تحقیقات جاری ہیں۔

بو ژیلائی تمام پارٹی عہدوں سے دستبردار ہو چکے ہیں لیکن پارٹی کے اندر ابھی بھی اُن کے حمایتی موجود ہیں۔ ایسے میں مبصرین کا اندازہ یہ ہے کہ شاید بو کو عدالتی کارروائی کا سامنا نہیں کرنا پڑے گا۔ بو کی اہلیہ کو معطل سزائے موت سنائی جا چکی ہے اور سابق پولیس چیف وانگ کو بھی سخت سزا ہو سکتی ہے۔

بو ژیلائی کی سزا غالباً پارٹی سے اخراج تک ہی محدود رہے گی۔ اِس صورت میں پارٹی کا مقصد بھی پورا ہو جائے گا کہ لوگ سر دست اُس پورے نظام کے بارے میں سوال کرنا چھوڑ دیں گے، جس نے اتنے بڑے پیمانے پر اختیارات کے ناجائز استعمال اور بد عنوانی کی اجازت دی۔

R. Kirchner/aa/ia