شمالی وزیرستان میں لڑکیوں کے ایک اور اسکول کو آگ لگا دی گئی

مقامی پولیس اہلکار رحمت اللہ نے بتایا ہے کہ صوبہ خیبر پختونخوا کے علاقے شمالی وزیرستان میں رات گئے ہونے والے اس حملے میں کوئی زخمی نہیں ہوا۔ اس ماہ کے آغاز میں بھی اس علاقے میں لڑکیوں کے دو اسکولوں کو بم سے نشانہ بنایا گیا تھا۔

پولیس نے بدھ 29 مئی کو ایک بیان جاری کرتے ہوئے کہا ہے کہ عسکریت پسندوں کے ایک گروپ نے پاکستانی طالبان کے اس سابق گڑھ میں لڑکیوں کے ایک اسکول کو آگ لگانے کے لیے مٹی کے تیل کا استعمال کیا، جس سے فرنیچر، کمپیوٹر اور کتابیں تباہ ہو گئیں۔

فوری طور پر کسی نے بھی اس واقعے کی ذمہ داری قبول نہیں کی لیکن شبہ ہے کہ اسے عسکریت پسندوں، خاص طور پر پاکستانی طالبان نے تباہ کیا ہے۔ پاکستانی طالبان خواتین کی تعلیم کے خلاف ہیں اور وہ ماضی میں بھی اس صوبے میں لڑکیوں کے اسکولوں کو نشانہ بناتے ہوئے کہہ چکے ہیں کہ خواتین کو تعلیم نہیں دینا چاہیے۔

قبل ازیں سترہ اور اٹھارہ مئی کی درمیانی شب بھی جنوبی وزیرستان میں ایسا ہی ایک حملہ کرتے ہوئے لڑکیوں کے ایک اسکول کو تباہ کر دیا گیا تھا جبکہ اس واقعے کے چند روز پہلے بھی ایک ایسی ہی کارروائی کی گئی تھی۔ 

چند برس پہلے بھی پاکستان کے شمال مغرب میں لڑکیوں کے اسکولوں پر متعدد حملوں ہوئے تھے، جب پاکستانی طالبان سوات سمیت متعدد قبائلی علاقوں پر قابض تھے۔ پاکستانی طالبان کو، جنہیں تحریک طالبان پاکستان یا ٹی ٹی پی کہا جاتا ہے، حالیہ برسوں کے دوران سوات اور اس سے ملحق دیگر علاقوں سے بے دخل کر دیا گیا تھا۔

لیکن پڑوسی ملک افغانستان میں طالبان کی حکومت آنے سے پاکستانی طالبان کو بھی حوصلہ ملا ہے اور حالیہ کچھ عرصے کے دوران ان کے حملوں میں اضافہ ہوا ہے۔

پاکستانی طالبان پاکستانی سکیورٹی فورسز کے خلاف بھی پے در پے حملوں کا سلسلہ جاری رکھے ہوئے ہیں جبکہ ان کے پاس وہ جدید ہتھیار بھی ہیں، جو نیٹو فورسز افغانستان میں چھوڑ گئی تھیں۔

وزیرستان ماضی میں وفاق پاکستان کے زیر انتظام قبائلی علاقے یا فاٹا کہلانے والے ان چھ نیم خود مختار خطوں میں سے ایک ہے، جہاں قانون کی حکمرانی نہ ہونے کے برابر ہوتی تھی۔ چند برس قبل ان قبائلی علاقوں کو اضلاع کا درجہ دے کر باقاعدہ طور پر صوبے خیبر پختونخوا میں شامل کر لیا گیا تھا۔

ا ا/ا ب ا (اے پی، ڈی پی اے)