شامی فوج کے چار اعلیٰ افسران منحرفین میں شامل

فری سیریئن آرمی کے ترجمان لیفٹیننٹ خالد الحمُود نے نیوز ایجنسی روئٹرز کو ٹیلیفون پر بتایا کہ اسد حکومت کی فوج کے چار اعلیٰ افسران کریک ڈاؤن کی پالیسی کے خلاف احتجاجاً سرکاری دستون کی صفیں چھوڑ کر باغیوں کے ساتھ شامل ہو گئے ہیں۔ اس طرح اسد حکومت کی فوج سے منحرف ہونے والے بریگیڈیئر جنرل کے عہدے کے افسران کی تعداد سات ہو گئی ہے۔ ان میں سے چھ افسران اس وقت ترکی میں ہیں۔

منحرف ہونے والے ساتویں بریگیڈیئر جنرل عدنان فرزات (Adnan Farzat) بدستور شام کے اندر منحرفین کی قیادت میں مصروف ہیں۔ انہوں نے شامی فوج چھوڑنے کا اعلان گزشتہ منگل کے روز یُو ٹیوب پر کیا تھا۔ وہ اگلے دنوں میں امکاناً حمص کے اردگرد کے علاقوں میں احتجاجاً فوج چھوڑنے والے فوجیوں کی ان کے جنگی آپریشن میں کمان کر سکتے ہیں۔

فری سیریئن آرمی کے ترجمان کے مطابق ملکی فوج سے منحرف ہونے والے اعلیٰ افسران اس وقت ترکی میں موجود ہیں اور وہ جلد ہی شام میں حکومتی فوج کے خلاف برسرپیکار فوجیوں کے مختلف یونٹوں کی کمان سنبھالنے والے ہیں۔ فری سیریئن آرمی نے ان افسران کے خاندانوں کی خیریت کے حوالے سے بھی اپنی تشویش کا اظہار کیا ہے۔گزشتہ ماہ منحرف ہونے والے بریگیڈیئر جنرل فیض امر کے خاندان کو اسد حکومت نے مقید کر رکھا ہے۔ ایسی بھی اطلاعات ہیں کہ منحرف ہونے والے کئی فوجیوں کے خاندانوں کے نمایاں افراد کو ہلاک کر دیا گیا ہے۔

اسد حکومت کی جانب سے بریگیڈیئر جنرل مصطفیٰ شیخ وہ پہلے اعلیٰ افسر تھے، جنہوں نے فوج کو چھوڑتے ہوئے باغیوں کے ساتھ شامل ہونے کا اعلان کیا تھا۔ یہ امر اہم ہے کہ شامی فوج میں عہدے کے اعتبار سے بریگیڈیئر جنرل پانچواں بڑا عہدہ ہے۔ مصطفیٰ شیخ کی سپریم سیریئن ملٹری کونسل کے پیرس میں مقیم ترجمان فہد المصری کا کہنا ہے کہ منحرف ہونے والے چاروں افسران اس وقت ترک حکومت کی نگرانی میں ہیں اور ان کے ناموں کو مخفی رکھا گیا ہے۔

شام میں اسد حکومت کے خلاف مزاحمت جاری رکھنے والے دو باغی گروپوں کے درمیان بھی عدم اتفاق سامنے آیا ہے۔ فری سیریئن آرمی کے ترجمان کے مطابق منحرف ہونے والے نئے افسران فری سیریئن آرمی کے بانی اور سربراہ کرنل ریاض الاسد کے مشیر بن رہے ہیں جب کہ دوسرے باغی گروپ سپریم ملٹری کونسل کا تعلق مصطفیٰ شیخ سے ہے۔ سپریم ملٹری کونسل نے دعویٰ کیا ہے کہ نئے افسران مصطفیٰ شیخ کا ساتھ دیں گے۔

رپورٹ: عابد حسین

ادارت: مقبول ملک