شامی بحران، اوباما اور ایردوآن کی ملاقات

جمعرات کے دن واشنگٹن میں امریکی صدر باراک اوباما اور ترک وزیر اعظم رجب طیب ایردوآن نے شامی تنازعے کے حل کے سلسلے میں اہم مذاکرات کے علاوہ دو طرفہ باہمی امور پر بھی تبادلہ خیال کیا۔ ملاقات کے بعد منعقد کی گئی مشترکہ پریس کانفرنس میں دونوں رہنماؤں نے شامی بحران پر اپنے مؤقف کا اعادہ کیا تاہم اوباما نے تسلیم کیا کہ شامی تنازعے کے حل کے لیے کوئی جادوئی فارمولا نہیں ہے۔

شامی بحران پر تبصرہ کرتے ہوئے امریکی صدر نے کہا، ’’ انتہائی غیر معمولی تشدد اور پیچیدہ صورتحال سے نمٹنے کے لیے کوئی جادوئی فارمولا نہیں ہے۔ انہوں نے مزید کہا، ’’ ہم صدر بشار الاسد کی حکومت پر دباؤ مزید بڑھائیں گے اور اپوزیشن کے ساتھ اپنے رابطوں میں تیزی لائیں گے۔‘‘ اوباما نے اسد کے اقتدار سے الگ ہو جانے پر زور دیتے ہوئے کہا، ’’ ہم (اوباما اور ایردوآن) دونوں متفق ہیں کہ اسد کو اقتدار سے الگ ہو جانا چاہیے۔‘‘

’کیمیائی ہتھیاروں کے استعمال کے شواہد‘

امریکی صدر باراک اوباما نے ترک وزیر اعظم ایردوآن سے ملاقات کے بعد یہ بھی کہا کہ واشنگٹن حکومت کو ایسے شواہد ملے ہیں کہ شام میں کیمیائی ہتھیار استعمال کیے گئے ہیں۔ تاہم انہوں نے کہا کہ اس حوالے سے ابھی مزید معلومات اکٹھا کیے جانے کی ضرورت ہے۔

امریکی صدر کے بقول مہلک ہتھیاروں کے استعمال سے متعلق باوثوق معلومات اکٹھی کر لینےکے بعد امریکی حکومت اس بارے میں اپنا ردعمل ظاہر کرے گی۔ یہ امر اہم ہے کہ شامی حکومت اور باغی دونوں ہی ایک دوسرے پر ایسے خطرناک ہتھیاروں کے استعمال کے الزامات عائد کرتے رہتے ہیں تاہم ابھی تک اس بارے میں کوئی ٹھوس ثبوت سامنے نہیں آ سکے ہیں۔

ایردوآن اور اوباما نے ایک ایسے وقت میں ملاقات کی ہے، جب اس کے ایک دن بعد ہی روسی صدر ولادیمیر پوٹن اقوام متحدہ کے سربراہ بان کی مون سے ملاقات کرنے والے ہیں۔ اطلاعات کے مطابق اس ملاقات میں بھی شام کی صورتحال سرفہرست رہے گی۔

امریکی صدر اور ترک وزیر اعظم نے اپنی ملاقات میں دو طرفہ تجارتی امور پر بھی تبادلہ خیال کیا۔ حالیہ برسوں میں دونوں ممالک کے مابین تجارت کے حجم میں اضافہ نوٹ کیا گیا ہے۔ جمعرات کے دن اوباما نے کہا کہ وہ چاہتے کہ ترکی کے ساتھ اقتصادی تعاون جاری رہے۔

ادھر اردن نے اعلان کر دیا ہے کہ آئندہ ہفتے ہونے والی ’فرینڈز آف سیریا‘ کانفرنس کا انعقاد وہ کرے گا۔ اس کانفرنس میں سعودی عرب، متحدہ عرب امارات، مصر، قطر، امریکا، برطانیہ، فرانس، ترکی ، جرمنی اور اٹلی کے وزرائے خارجہ شرکت کر رہے ہیں۔

ab/ia (AFP, Reuters, dpa)