’دعائیں ہی سب سے موثر دوا ثابت ہو ں گی‘
28 مئی 2016سیاسی مسائل سے دوچار اور پاناما پیپرز کے انکشافات کے غیر معمولی دباؤ میں آئے ہوئے میاں نواز شریف کا گزشتہ چند ماہ کے دوران یہ لندن کا دوسرا دورہ ہے جس کے بارے میں میڈیا کو بیان دیتے ہوئے اُن کی صاحب زادی مریم نواز نے جمعے کی شب دیر گئے ایک ٹوئیٹ پر اپنے پیغام میں تحریر کیا،’’وزیر اعظم نواز شریف کی آئندہ منگل کو ہارٹ سرجری ہوگی۔ اُن کے لیے دعائیں ہی سب سے زیادہ موثر دوا ثابت ہوں گی۔‘‘
مریم نواز نے اپنے والد کو لاحق عارضہ قلب کی تفصیلات بتاتے ہوئے کہا کہ 2011 ء سے انہیں دل کی بیماری کی پیچیدگیوں کا سامنا ہے جسے دور کرنے کے لیے معالجے کا عمل جاری ہے۔
دریں اثناء مقامی ذرائع سے موصولہ اطلاعات کے مطابق وزیر اعظم نے اپنی صحت کی صورتحال کے پیش نظر گزشتہ کچھ عرصے کے دوران اپنی کئی سیاسی سرگرمیاں اور ملکی اور غیر ملکی دورے بھی منسوخ کر دیے ہيں۔ مثال کے طور پر چند دن قبل پاکستانی فضائیہ میں نئے طیاروں کی شمولیت اور تھر کول منصوبے کے حوالے سے اہم تقریبات میں شرکت کے لیے اُن کا کراچی کا دورہ اور کچھ عرصے قبل ترکی میں ہونے والے ایک اہم اجلاس میں شرکت کے لیے بھی اُن کا دورہ منسوخ ہو گیا تھا۔ اس اہم اجلاس کے موقع پر پاکستان کی نمائندگی صدر ممنون حسین نے کی تھی۔ اُدھر پاکستان کے وزیر خزانہ اسحاق ڈار کو آئی ایم ایف اور ورلڈ بینک سے مذاکرات کے لیے امریکا جانا تھا لیکن وزیر خزانہ کا دورہ بھی غالباً وزیر اعظم کی صحت کی صورتحال کے سبب منسوخ کر دیا گیا۔
نواز شریف کی بیٹی مریم نواز نے کہا ہے کہ اُن کے والد ہارٹ سرجری کے بعد کم از کم ایک ہفتے لندن میں ہسپتال میں رہیں گے اور صحت یابی اور ڈاکٹروں کی طرف سے سفر کی اجازت ملتے ہی وطن لوٹ جائیں گے۔