خیبرپختونخوا کے حجام ڈیزائن والی داڑھی نہیں بنائیں گے

داڑھی سے متعلق ایسی پابندی قریب ایک عشرے قبل بھی خیبر پختونخوا کے صوبے میں عائد کی گئی تھی جب پاکستانی طالبان سمیت جہادی گروپوں نے صوبے کے حجاموں کو مذہب اسلام کے شرعی قوانین کے خلاف داڑھی بنانے پر شدید نتائج کی دھمکی دی تھی۔

پشاور میں سلیمانی ہیئر ڈریسر تنظیم کے سربراہ شریف کاہلو نے گزشتہ شام ایک نیوز کانفرنس میں بتایا،’’ داڑھی کے مختلف طرح کے ڈیزائن بنانا پیغمبر اسلام کی سنت کے خلاف ہے۔‘‘

کاہلو کا مزید کہنا تھا کہ ہزاروں حجاموں نے، جو اُن کی ایسوسی ایشن کے رکن بھی ہیں، اس فیصلے پر پابند رہنے کا وعدہ کیا ہے۔ علاوہ ازیں فیصلے سے متعلق گاہکوں کو صوبے بھر میں ہیئر ڈریسروں کی دکانوں میں نوٹس لگا کر آگاہ کر دیا جائے گا۔

شریف کاہلو کا کہنا تھا کہ اُن پر کسی جہادی گروپ کی جانب سے کوئی دباؤ نہیں ہے بلکہ یہ فیصلہ ضمیر کی آواز پر کیا گیا ہے۔ کاہلو کا یہ بھی کہنا تھا کہ انہوں نے صوبے بھر میں تمام بڑے شہروں اور اضلاع کی مقامی انتظامیہ سے ملاقات کی ہے اور سب نے ہی انہیں بھرپور تعاون کا یقین دلایا ہے تاہم اس حکم نامے کو سرکاری حیثیت دینے سے معذرت کی ہے۔

خیال رہے کہ جہادی گروپوں نے ایک عشرے قبل خیبرپختونخوا صوبے میں حجامت بنانے کی کئی دکانوں پر حملہ کیا تھا۔ اُن کا موقف تھا کہ داڑھی منڈوانا غیر شرعی ہے۔

حالیہ چند برسوں میں پاکستان کے لاہور اور کراچی جیسے بڑے شہروں میں مرد حضرات میں جدید فیشن کو اپنانے اور پابندی سے سیلون اور بیوٹی پارلروں میں جانے کے رجحان میں اضافہ ہوا ہے۔ ملک میں بڑھتی ہوئی مڈل کلاس اس حوالے سے زیادہ سرگرم نظر آتی ہے۔