جرمن ٹیم پھر شاندار کھیل کا مظاہرہ کرنے سے محروم رہی

ایک دوستانہ فٹ بال میچ میں جرمن ٹیم نے سعودی عرب کو ایک کے مقابلے میں دو گول سے مات دے دی۔ ماہرین کے مطابق جرمنی ٹیم کا مجموعی کھیل غیر متاثر کن رہا۔ جرمنی کے لیے ٹیمو ویرنر کے دو گول کامیابی کی ضمانت بن گئے۔

جرمن کوچ یوآخم لوو نے میچ کے بعد اعتراف کیا کہ اُن کی ٹیم نے گول کرنے کے کئی مواقع ضائع کیے اور دوسرے حصے میں کمزور کھیل پیش کرنے کے بارجود خوشی قسمتی سے جیت گئی۔ لوو نے یہ بھی کہا کہ وہ اپنی ٹیم کی ورلڈ کپ میں شرکت کے حوالے سے کسی تشویش میں مبتلا نہیں ہیں۔

روس میں چودہ جون سے شروع ہونے والے فٹ بال ورلڈ کپ سے قبل جرمن ٹیم کی مجموعی پرفارمنس پر انگلیاں اٹھ رہی ہیں۔ اس سے قبل ایک دوسرے وارم اپ میچ میں جرمن ٹیم کو آسٹریا سے شکست کا سامنا رہا۔ مبصرین کے مطابق ورلڈ کپ شروع ہونے والا ہے اور کوچ یوآخم لوو ابھی تک ٹیم کی اسٹرائیکر لائن کو حتمی شکل دینے کے بجائے تجربات کا سلسلہ جاری رکھے ہوئے ہیں۔

دوسری جانب جرمن ٹیم کے فٹ بالر مسعود اوزیل کو فِٹ نیس کا سامنا ہے۔ وہ جمعہ آٹھ جون کے میچ کے لیے گھٹنے کی انجری کی وجہ سے منتخب نہیں کیے گئے۔ جرمن فٹ بال ایسوسی ایشن کے مطابق اوزیل کی ورلڈ کپ میں شرکت مشکوک نہیں اور وہ اس سے قبل فٹ ہو جائیں گے۔

یہ بھی اہم ہے کہ اوزیل گزشتہ چار ایام سے ٹیم کی ٹریننگ میں شریک نہیں ہو رہے اور اس باعث بھی اُن کی مکمل فٹ نس پر انگلیاں اٹھ رہی ہیں۔ ٹیم ڈائریکٹر اولیور بیشوف کے مطابق اوزیل کی انجرفی کوئی ڈرامائی صورت حال نہیں اور تربیتی کیمپ میں تیز رفتاری سے بھاگنے کی مشق جاری رکھے ہوئے ہیں۔

ورلڈ کپ میں دفاعی چیمپئن جرمنی گروپ ایف میں ہے۔ اس گروپ کی دوسری ٹیمیں میکسیکو، سویڈن اور جنوبی کوریا ہیں۔ فٹ بال ماہرین کے مطابق یہ کوئی آسان گروپ نہیں ہے۔ جرمن ٹیم کو گروپ سے اگلے راؤنڈ تک پہنچنے کے لیے سنجیدہ محنت درکار ہو گی۔ گروپ ایف کا پہلا میچ جرمنی اور میکسیکو کے درمیان سترہ جون کو کھیل جائے گا۔