جرمنی میں اکثریت کمبشن انجن پر پابندی کے خلاف، سروے

جرمن نشریاتی ادارے  اے آر ڈی کی جانب سے کرائے گئے ایک سروے میں شرکا کی اکثریت نے نئی گاڑیوں میں روایتی ایندھن سے چلنے والے انجن کے استعمال پر ممکنہ پابندی کی مخالفت کی ہے۔

کمبشن انجن میں ایندھن کو جلا کر توانائی پیدا کی جاتی ہے اور یہ آلودگی کا باعث بنتے ہیں۔ یورپی کمیشن اس ذریعے سے کاربن ڈائی آکسائیڈ کے اخراج میں 2030ء تک 55 فیصد کمی اور 2035ء تک اس کا مکمل خاتمہ چاہتا ہے۔

عالمی ماحولیاتی کانفرنس میں امریکی ٹیم روایتی ایندھن کے فوائد گنوائے گی

چناچہ سن 2035 تک کمبشن انجن پر پابندی کے لیے یورپی پارلیمان میں اس ماہ ووٹنگ ہونی تھی لیکن جرمنی کی جانب سے اس اقدام کی مخالفت کے بعد اس معاملے پر ووٹنگ کو ملتوی کر دیا گیا تھا۔ جرمنی کے علاوہ اس اقدام کو اٹلی اور دیگر کئی ممالک کی جانب سے بھی مخالفت کا سامنا ہے۔

اے آر ڈی کے سروے میں شامل تقریباﹰ دو تہائی یا 67 فیصد جرمن شہریوں نے بھی نے اس ممکنہ پابندی کی مخالفت کی جبکہ 25 فیصد نے اس کی حمایت کی۔

اے آر ڈی کا کہنا ہے کے اس اقدام کی حمایت کرنے والوں میں اکثریت 34 سال تک کے ںوجوانوں اور اعلی تعلیم یافتہ افراد کی تھی۔ اس کے مطابق نوجوانوں میں سے 33 فیصد افراد اور اعلی تعلیم یافتہ شرکا میں سے 34 فیصد افراد نے اس کی حمایت کی۔

اس رپورٹ میں مزید کہا گیا کہ جرمنی کی گرین پارٹی کے ووٹرز کی اکثریت نے بھی اس ممکنہ پابندی کی حمایت کی۔ ان میں سے 69 فیصد کا کہنا تھا وہ اس اقدام کے حق میں ہیں۔

بھارت 2030 ء تک تمام گاڑیوں کو الیکٹرک کارز بنانے کا خواہش مند

ماہرین کا کہنا ہے کہ یورپی یونین کا کمبشن انجن پر پابندی اور اس ذریعے سے کاربن ڈائی آکسائیڈ کے اخراج کے خاتمے کا ہدف حاصل کیا جا سکتا ہے۔

اس وقت یورپ میں بجلی سے چلنے والی گاڑیوں کی فروخت میں اضافہ دیکھا جا رہا ہے۔ سن 2020ء میں یورپی یونین میں نئی فروخت ہونے والی الیکٹرک گاڑیوں کی شرح 11 فیصد تھی اور 2021ء میں یہ بڑھ کر 18 فیصد ہوگئی تھی۔

م ا/ ع ا(ڈی پی اے، ای پی ڈی)