جرمنی: صنفی مساوات کی پہلی قومی حکمت عملی

جرمن چانسلر انگیلا میرکل کی کابینہ نے ملک میں صنفی عدم مساوات کو ختم کرنے کی ایک جامع حکمت عملی یا Strategy کی باضابطہ منظوری دے دی ہے۔ اس اسٹریٹیجی کے تحت نو مختلف پہلوؤں پر توجہ مرکوز کرتے ہوئے وفاقی سطح پر صنفی مساوات کا نفاذ کیا جائے گا۔

اس کی تفصیلات وفاقی حکومت کی وزیر برائے خاندانی امور فرانزسکا گیفی نے کیا۔ انہوں نے اس منصوبے کو 'مستقبل کے لیے مضبوط‘ یا strong for the future قرار دیا۔ گیفی کے مطابق ملک میں صنفی مساوات کے لیے جرمن حکومت کا یہ ایک مشترکہ عزم ہے اور اس میں تمام محکمے شامل ہوں گے۔

 گیفی نے پریس کانفرنس میں واضح کیا کہ اس منصوبے پر عمل پیرا ہونے سے ہی ہر شعبے میں صنفی مساوات کو ممکن بنایا جائے گا۔ جرمن حکومت کے مطابق اب  اس معاملے کی نگرانی خواتین کی وزارت نہیں کرے گی بلکہ تمام وزارتوں اور محکموں کو اس پر عمل کرنے کا پابند کر دیا ہے۔

جرمن وزیر کا کہنا تھا کہ دہائیوں کے بعد ساری کابینہ اس منصوبے پر متفق ہوئی ہے۔  صنفی مساوات کی اس حکمت عملی پر عمل درآمد کے لیے ایک خصوصی ادارے کے قیام کے لیے اراکینِ پارلیمنٹ نے اپنی رضامندی بھی ظاہر کر دی ہے اور یہی ادارہ دیگر تمام محکموں میں حکومتی منصوبے کی نگرانی کرے گا۔

خاندانی امور کی وزیر فرانزسکا گیفی کے مطابق ملک کے بنیادی دستور کی شق تین کے تحت مردوں اور عورتوں میں مساوات پیدا کرنے کو فروغ دیا جائے گا۔ انہوں نے یہ بھی کہا کہ مختلف محکموں میں خواتین اور مردوں کی تنخواہوں اور پینشن کو برابری کی سطح پر لایا جائے گا۔ حکومتی پلان کے تحت مردوں کے مقابلے پر عورتوں کو روزگار کے مساوی مواقع فراہم کیے جائیں گے۔ میرکل حکومت کی وزیر نے یہ بھی بتایا کے مختلف محکموں اور اداروں کے نگرانی یا سپروائزری بورڈ میں تیس فیصد خواتین کو شامل کرنے کے قانون پر عمل کرایا جائے گا۔ اس قانون کا نفاذ ہونے سے چھ سو کمپنیوں میں اعلیٰ تعلیم یافتہ خواتین سپروائزری بورڈ کا حصہ بن سکیں گی۔ اس وقت ایک سو پانچ کمپنیاں صنفی مساوات کی پالیسی پر عمل پیرا ہیں۔

ڈی ڈبلیو کے ایک سوال کے جواب میں فرانزسکا گیفی نے بتایا کے انگیلا میرکل کی سیاسی جماعت کرسچین ڈیموکریٹک یونین(سی ڈی یو) نے پارٹی کے اندر خواتین امیدواروں کے لیے کوٹہ مقرر کرنے کا فیصلہ کیا ہے اور پارٹی کے داخلی عہدوں پر بھی انہیں تعینات کیا جائے گا۔

ع ح، ع ا(ای ایف پی، ڈی پی اے)