جاپان کا نیا سکیورٹی پلان، توجہ متنازعہ جزائر پر

خبر ایجنسی ڈی پی اے کی رپورٹوں کے مطابق نئی دفاعی پالیسی کے تحت جاپان کی سمندر پار فوجوں کے لیے زیادہ بہتر سکیورٹی کردار ممکن ہو جائے گا۔ ساتھ ہی اسلحے کی برآمدات کے لیے نئے رہنما ضابطے بھی وضع کر دیے گئے ہیں، جو ٹوکیو کی دفاعی حکمت عملی میں ایک نئی تبدیلی کی نشاندہی کرتے ہیں۔

ٹوکیو حکومت کی اس نئی دفاعی پالیسی میں اتحادی ملک امریکا کے ساتھ اور بھی قریبی سکیورٹی تعلقات پر زور دیا گیا ہے جس کا سبب خطے میں چین کے بڑھتے ہوئے فوجی اثر و رسوخ پر پائی جانے والی تشویش ہے۔

جاپانی وزیر اعظم شِنزو آبے نے ملکی فوج پر عائد چند پابندیوں کو ختم کرنے کی کوشش کی ہے۔ اس پر کئی سیاسی حلقوں نے ان پر تنقید کی۔ لیکن کئی دیگر سیاسی حلقوں نے اس وجہ سے وزیر اعظم کی سوچ کی حمایت کی کہ وہ بھی خطے میں بڑھتی ہوئی کشیدگی خاص کر بیجنگ کے ساتھ کھچاؤ کی وجہ سے خطرات کو محسوس کرتے ہیں۔

ٹوکیو حکومت کی نئی سکیورٹی اسٹریٹیجی حال ہی میں قائم کی گئی نیشنل سکیورٹی کونسل کی طرف سے خارجہ سیاست اور دفاع کے شعبوں میں فیصلوں کے لیے پالیسی بنیادیں بھی فراہم کرے گی۔ ساتھ ہی جاپانی کابینہ نے ایک ایسے منصوبے کی منظوری بھی دے دی ہے جس کے تحت ملکی فوج کا ایک ایسا یونٹ قائم کیا جائے گا جو زمینی اور سمندری دونوں طرح کے علاقوں میں فرائض انجام دے سکے گا۔ یہ نیا یونٹ دور دراز سمندری علاقوں میں موجود جاپانی جزائر کی حفاظت کو یقینی بنانے کی صلاحیت کا حامل ہو گا۔

اس فیصلے کی وجہ یہ ہے کہ جاپان کی وسیع و عریض سمندری حدود اور ان میں پیش آنے والے واقعات گزشتہ کچھ عرصے سے ٹوکیو کے لیے سلامتی کے حوالے سے تشویش کا باعث رہے ہیں۔

خاص کر بحیرہء مشرقی چین میں واقع وہ سینکاکو جزائر جن کا انتظام تو جاپان کے پاس ہے لیکن جن کی ملکیت کے دعوے چین اور تائیوان دونوں کی طرف سے کیے جاتے ہیں۔ چین ان جزائر کو متنازعہ قرار دے کر انہیں دیاؤ یو Diaoyoاور تائیوان انہیں تیاؤیو تائی Tiaoyutiaکا نام دیتا ہے۔

نئی جاپانی سکیورٹی پالیسی کے نتیجے میں ٹوکیو حکومت کے لیے ممکن ہو جائے گا کہ وہ امریکا سے جاسوسی کے لیے استعمال ہونے والے ڈرون طیارے اور میزائل شکن نظام خرید سکے اور ایسی فوجی گاڑیاں بھی حاصل کر سکے جو زمینی اور سمندری دونوں علاقوں میں استعمال ہو سکیں۔

خبر رساں ادارے ایسوسی ایٹڈ پریس کے مطابق نئی قومی سکیورٹی پالیسی میں جاپانی کابینہ نے اگلے پانچ سال کے دوران دفاعی شعبے میں ممجموعی اخراجات میں پانچ فیصد اضافے کی منظوری بھی دے دی ہے۔