بیروت میں بڑھتی کشیدگی

لبنان میں اعلیٰ سکیورٹی اہلکار کی بم دھماکے میں ہلاکت کے بعد فرقہ وارنہ کشیدگی میں اضافہ دکھائی دے رہا ہے۔ لبنان کی شیعہ آبادی ہمسایہ ملک شام میں پیدا شدہ حکومت مخالف مسلح و خونی تحریک میں اقلیتی شیعہ علوی آبادی سے تعلق رکھنے والے صدر بشار الاسد کی حمایت کر رہی ہے اور سنی آبادی شام کی اکثریتی مگر اقتدار سے محروم سنی آبادی کی حمایت میں اپنی آواز کے سلسلے کو بلند کیے ہوئے ہے۔ امن و سلامتی کو یقنی بنانے کے لیے سرکاری فوج کے دستے بیروت کے سنی علاقوں میں متعین کر دیے گئے ہیں۔

لبنانی دارالحکومت بیروت کی اہم نواحی بستی طریق الجدید (Tariq al Jadida) میں پیر کی سہ پہر فوج داخل ہو گئی تھی۔ اسی طرح فوج شمالی لبنانی بندرگاہی شہر طرابلس میں بھی متعین کر دی گئی ہے۔ الطریق الجدید اور لبنانی طرابلس میں حالات انتہائی کشیدہ بیان کیے جاتے ہیں۔ لبنانی طرابلس کی اندرونی سلامتی گزشتہ کئی دنوں سے جاری شامی صدر بشار الاسد کے حامیوں اور مخالفین کے درمیان لڑائی کی وجہ سے مخدوش ہو چکی ہے۔ چھ سے زائد افراد کی ہلاکت کو بھی رپورٹ کیا گیا ہے۔

 پیر کے روز سے الطریق الجدید اور لبنانی طرابلس کی گلیوں میں سرکاری فوج کے بکتر بند دستے گشت میں مصروف ہیں۔ فوج نے دونوں شہروں کی بڑی بڑی سڑکوں کو کھلا  رکھنے کے لیے بھی اہم چوراہوں میں پوزیشنز سنبھال رکھی ہیں۔ اسی بستی کے سنی مظاہرین وزیراعظم نجیب میقاتی کی حکومت کے مستعفی ہونے کا مطالبہ کر رہے ہیں۔ میقاتی حکومت کو مئی میں سنی عالم احمد عبدل واحد کی ہلاکت کے بعد سے سنی آبادی کی جانب سے شدید مخالفت کا سامنا ہے۔

طریق الجدید میں مسلح افراد اور فوج کے درمیان ہونے والے فائرنگ کے تبادلے میں کم از کم چھ افراد کے زخمی ہونے کو رپورٹ کیا گیا ہے۔ طریق الجدید کی بستی سابق وزیر اعظم سعد الحریری کے حامیوں کا بھی گڑھ خیال کیا جاتا ہے۔ سعد الحریری نے بھی عوام کو پرامن رہنے کی اپیل کی ہے۔ اسی علاقے کے قریب ایک فلسطینی کو فوج کی گولی کا سامنا کرنا پڑا جب وہ ایک پٹرول بم فوجی گشتی پارٹی پر پھینکنے کی کوشش میں تھا۔ دوسری جانب لبنانی طرابلس میں شامی صدر کے عقیدے کے علویوں کی تعداد زیادہ ہے۔ اس شہر میں علویوں اور سنیوں کے درمیان ہونے والی جھڑپوں میں سات افراد کی ہلاکت ہو چکی ہے۔ ان میں دو علوی اور پانچ سنی شامل ہیں۔

لبنان میں کشیدگی کی تازہ لہر جمعے سے شروع ہے جب داخلی سلامتی کے انٹیلیجنس ادارے کے سربراہ بریگیڈیئر جنرل وسام  عدنان الحسن ایک بم دھماکے میں ہلاک ہو گئے تھے۔ نجیب میقاتی کے مستعفی ہونے کا فوری مطالبہ وسام الحسن کی ہلاکت کے بعد پھر سے زور شور سے بلند کر دیا گیا ہے۔ اسی اثنا میں فوج کی جانب سے جاری ہونے والے بیان میں کہا گیا ہے کہ سول حکومت کی اتھارٹی کو برقرار رکھنے کے لیے وہ امن و سلامتی کو بحال رکھنے میں اپنا کردار ادا کرتی رہے گی۔ لبنان کی شیعہ اور سنی سیاسی حلقے شام کے اندرونی خلفشار کے تناظر میں لبنان میں بڑھتی کشیدگی اور تناؤ پر انتہائی مظطرب دکھائی دیتے ہیں۔

ah sks (AFP)