بھگوت گيتا کی روس ميں اشاعت پر کوئی اعتراض نہيں، روسی عدالت

خبر رساں ادارے اے ايف پی کی رپورٹ کے مطابق روس کے خطے سائبیریا کے شہر تومسک کی ايک عدالت ميں استغاثہ کی جانب سے بھگوت گيتا کی اشاعت سے متعلق سابقہ عدالتی فيصلے کو تبديل کرنے کے مطالبے کو رد کر ديا گيا ہے۔ بھگوت گيتا کی اشاعت کے حق ميں ليے جانے والے عدالت کے فيصلے پر قانونی نمائندے الیگزینڈر شخوف نے کہا ہے، ’يہ فيصلہ درست، انصاف کے مطابق اور قانونی طور پر درست ہے۔‘

گزشتہ سال دسمبر میں ایک زیریں عدالت کے فیصلے ميں اس کتاب کی اشاعت کی اجازت دی گئی تھی۔ عدالت کے مطابق اس کتاب ميں کوئی انتہا پسند موجود نہيں تھا۔ البتہ استغاثہ کئی ماہ سے اس عدالتی فيصلے کو چيلنج کرنے کے ليے کام کر رہا تھی کيونکہ اس کتاب ميں Swami Prabhupada کا تحریر کردہ دیباچہ شامل ہے۔ Prabhupada ہری کرشنا نامی تحريک کے سربراہ ہيں اور يہ تحريک روس ميں متعدد قانونی مسائل کا شکار ہو کر متنازعہ ہو چکی ہے۔

اس فيصلے پر اپنے خيالات کا اظہار کرتے ہوئے روسی دارالحکومت ماسکو ميں بھارتی سفير اجائی ملہوترا نے اپنے اطمينان کا اظہار کيا ہے اور يہ بھی کہا ہے کہ وہ اب اميد کرتے ہيں کہ روسی اہلکار اس معاملے کا پيچھا چھوڑ ديں گے۔ روس ميں اس کيس کے باعث نئی دہلی اور ماسکو کے مابين تعلقات ميں خرابی کے بھی خدشات موجود تھے۔ بھارتی وزير خارجہ ايس ايم کرشنا بھی اپنے ايک بيان ميں پراسيکيوٹرز کی جانب سے اس کتاب پر پابندی عائد کرنے کی کوششوں پر شديد برہمی کا اظہار کر چکے ہيں۔

واضح رہے کہ معاملے کے آغاز ميں روسی دفتر خارجہ نے بھی اس کتاب پر پابندی کی حمايت کی تھی۔ البتہ دفتر خارجہ کا موقف يہ تھا کہ انہيں ايک مخصوص حصے پر اعتراض ہے پوری اشاعت پر نہيں۔ بعد ميں ملکی پراسيکيوٹرز کی جانب سے اس کتاب کی روس ميں اشاعت پر پابندی عائد کروانے کے ليے ايک جارحانہ مہم چلائی گئی۔ پراسيکيوٹرز کو يہ خدشہ تھا کہ ہری کرشنا کہیں روس ميں ملکی مذہب کو کمزور نہ کر دے۔ البتہ روس ميں رواں ہفتے سائنسدانوں اور انسانی حقوق کے ليے کام کرنے والے چند اہم ملکی اہلکاروں نے صدر دیمتری میدویدیف سے ملاقات کی اور انہيں ملک ميں مذہبی آزادی سے متعلق تجاويز پيش کيں۔ ان اہلکاروں نے ملکی صدر سے يہ درخواست بھی کی تھی کہ وہ بھگوت گيتا کے معاملے پر نظر ڈاليں۔

رپورٹ: عاصم سليم

ادارت: حماد کيانی