بھوپال جیسے سانحے روکنے کے لیے سخت قوانین کی اشد ضرورت

ماحولیات کے لیے سرگرم موقر ادارہ سینٹر فار سائنس اینڈ انوائرنمنٹ نے دنیا کے بدترین صنعتی سانحوں میں سے ایک ھوپال گیس سانحہ کی تیسویں برسی کے موقع پراپنی رپورٹ میں کہا گیا ہے کہ مستقبل میں ایسے کسی سانحہ کے خدشہ کو ٹالنے کے لیے نئے نئے ادارے قائم کرنے کے بجائے موجودہ اداروں کو ہی زیادہ مستحکم بنانے اور ضابطوں کو سختی سے نافذ کرنے نیز ان کی نگرانی کے لیے موثر میکنزم بنانے کی ضرورت ہے۔ اسی کے ساتھ ایسا ٹھوس قانون بھی ضروری ہے جس سے قصورواروں کو سزا دلائی جا سکے اور قوانین میں موجود خامیوں کا سہارا لے کر بچنے کی ڈو(Dow) کیمیکل جیسی کمپنیوں کی کوششوں کو ناکام بنایا جا سکے۔ اگر ایسا نہ کیا گیا تو طاقت ور ملٹی نیشنل کمپنیاں لوگوں کی زندگیوں سے اسی طرح کھیلتی رہیں گی اور بھوپال جیسے سانحے ہوتے رہیں گے۔

خیال رہے کہ امریکہ کی ڈو کیمیکل نے ہی2001 میں بھوپال کی یونین کاربائیڈ کو خرید لیا تھا۔ متاثرین کا کہنا ہے کہ چونکہ یہی اب کارخانے کی موجودہ مالک ہے اس لیے قانوناَ اسے ہی معاوضہ ادا کرنا چاہیے لیکن ڈو کیمیکل نے واضح طور پر کہا ہے کہ وہ نہ تو معاوضہ ادا کرے گی اور نہ ہی کارخانے میں موجودہ سینکڑوں ٹن پڑے مہلک کیمکلز کو صاف کرے گی۔ بھوپال سے شائع ہونے والے ہندی روزنامہ نئی دنیا کے مدیر سریش بافنا نے اس حوالے سے ڈی ڈبلیو سے بات کرتے ہوئے کہا کہ آج یونین کاربائیڈ کے احاطے میں 700 ٹن زہریلا کچرا پڑا ہے اور اس کی صفائی کیسے ہو یہ تنازعہ برقرار ہے۔ کوئی بھی اس کی ذمہ داری لینے کو تیار نہیں ہے۔ پچھلے دنوں جرمنی کے ساتھ اس سلسلے میں بات چیت ہوئی تھی اور کسی کمپنی کے ساتھ معاہدہ بھی ہو گیا تھا لیکن جرمنی میں اس کی مخالفت کے بعد وہ کمپنی بھی پیچھے ہٹ گئی۔

واضح رہے کہ بھوپال گیس سانحہ معاملے میں حکومت کا رویہ شروع سے ہی غیر سنجیدہ رہا ہے۔ 1989 میں اس نے قانونی چارہ جوئی کا اختیار متاثرین سے چھین کر اپنے ہاتھوں میں لے لیا اور خاموشی سے سپریم کورٹ میں ایک مفاہمت نامہ پیش کر کے یونین کاربائیڈ سے صرف 470 ملین ڈالر پر معاملہ طے کر لیا جب کہ معاہدہ کے تحت کمپنی کو 3.3 بلین ڈالر ادا کرنے تھے۔ گو کہ اس فیصلے کو عدالت میں چیلنج کر دیا گیا لیکن معاوضہ کی رقم جوں کی توں برقرار ہے اور متاثرین کے حصے میں صرف پچیس پچیس ہزار روپے یعنی تقریباﹰ 350 ڈالر آئے۔ 1996میں ایک بار پھرعدالت میں کیس کے دفعات تبدیل کر دیے گئے جس کی رو سے قصورواروں کو صرف دو سال کی سزا دی تھی اور 2010 میں 26 برس بعد جب بھوپال کی ایک نچلی عدالت نے اس کیس میں فیصلہ سنایا تو سات ملزمین میں سے ہر ایک کو صرف دو دو برس کی سزا ملی۔ سریش بافنا کا کہنا ہے کہ اس کیس کے کئی سوالات اب بھی حل طلب ہیں۔ قانون سے متعلق سوالات ہیں، ماحولیات سے متعلق سوالات ہے اور 30 برس بعد بھی ان سوالات کا حل ہونا باقی ہے۔
واضح رہے کہ 2-3 دسمبر 1984 کی رات کو یونین کاربائیڈ کارخانہ سے 40 میٹرک ٹن میتھائل آئسو سائنائٹ زہریلی گیس خارج ہونے سے تین ہزار افراد فوری طور پر ہلاک ہو گئے تھے جب کہ بعد کے برسوں میں 25 ہزار افراد لقمہ اجل بن گئے اور پانچ لاکھ سے زائد افراد مختلف بیماریوں کا شکار اور ہزاروں دیگر مفلوج ہو چکے ہیں۔ یونین کاربائیڈ کے اس وقت کے چیئرمین وارن اینڈرسن کی گذشتہ ماہ وفات کے بعد انہیں قانون کے کٹہرے میں لانے کی متاثرین کی امیدیں بھی ختم ہو گئیں۔
دریں اثنا ایمنسٹی انٹرنیشنل نے وزیر اعظم نریندر مودی سے اپیل کی ہے کہ اگلے ماہ امریکی صدر باراک اوباما کے دورہ بھارت کے دوران وہ اس معاملے کو ضرور اٹھائیں۔