بنڈس لیگا: بائرن میونخ کی برتری برقرار

ہفتے کے روز نوریمبرگ کے خلاف کھیلے جانے والے میچ کے ڈرا ہو جانے کے باوجود بائرن میونخ نے جرمن فٹ بال لیگ میں اپنی پہلی پوزیشن برقرار رکھی ہوئی ہے۔ ہفتے ہی کو کھیلے گئے ایک اور میچ میں شالکے کی ٹیم لیورکوزن سے صفر کے مقابلے میں دو گول سے ہار گئی۔

بائرن مینخ اور نیورمبرگ کے درمیان کھیلے جانے والے میچ میں میونخ کی ٹیم نے ابتدا ہی میں ایک گول کر کے سبقت حاصل کر لی تھی تاہم ماریو مانڈزوکچ کی جانب سے میچ کے تیسرے منٹ میں کیے جانے والے اس گول کو مارکوس فوئلنیر نے دوسرے ہاف کے ابتدا میں گول کر کے برابر کر دیا۔

میونخ کی ٹیم کے کوچ نے میچ ڈرا ہو جانے کو تسلیم کرتے ہوئے کہا کہ یہ ’’دنیا ختم ہو جانے کے مترادف نہیں ہے۔‘‘ ان کا کہنا تھا کہ میونخ کی ٹیم میچ پر حاوی رہی مگر وہ دوسرا یا تیسرا گول کرنے میں ناکام رہی۔

بائرن میونخ کی ٹیم منگل کے روز ہسپانوی ٹیم ویلینشیا کے خلاف چیمپیئنز لیگ کے گروپ راؤنڈ کا ایک اہم میچ کھیلے گی۔

میونخ کی ٹیم کے لیے اس میچ کے ڈرا ہو جانے سے کوئی خاص فرق نہیں پڑا کیوں کہ بنڈس لیگا میں دوسرے نمبر پر براجمان ٹیم شالکے اپنا میچ دو صفر سے ہار گئی۔ شالکے کی ٹیم کے کپتان بینیڈکٹ کا کہنا تھا کہ شالکے نے میچ کے دوران زبردست غلطیاں کیں اور میچ پر اپنی گرفت برقرار نہیں رکھی۔

کھیلے گئے دیگر میچوں میں فرینکفرٹ نے آؤگسبرگ کو  کو دو صفر سے جب کہ دفاعی چیمپیئن ڈورٹمنڈ نے فوئرتھ کی ٹیم کو تین ایک سے ہرا دیا۔

shs / at (AFP, Reuters)