بارہ ہزار سال پرانا ماموت کا ڈھانچہ نصف ملین یورو میں نیلام
فرانس میں تقریباﹰ بارہ ہزار سال پرانا، ہاتھیوں کی طرح کے لیکن معدوم ہو چکے ماموتوں کی نسل کے ایک اونی جانور کا بہت بڑا ڈھانچہ قریب ساڑھے پانچ لاکھ یورو میں نیلام کر دیا گیا۔ ماموت کا یہ ڈھانچہ سائبیریا سے ملا تھا۔
ہزارہا برس پرانا فیل پیکر کا ڈھانچہ
ماموت کا یہ ڈھانچہ فرانسیسی شہر لیوں میں پانچ لاکھ اڑتالیس ہزار یورو میں نیلام کیا گیا۔ یہ ڈھانچہ روس میں سائبیریا کے علاقے سے ملا تھا۔
کسی ماموت کا نجی ملکیت میں سب سے بڑا ڈھانچہ
3.4 میٹر بلند اس ڈھانچے کو ایک ایسے فرانسیسی صنعت کار نے خریدا، جس کی کمپنی کا لوگو بھی ایک ماموت کی شبیہ پر مشتمل ہے۔ اس تصویر میں اس ماموت کے ایک پاؤں کی ہڈیاں نظر آ رہی ہیں۔
ریلوے اسٹیشن میں نیلامی
سائبریا سے ملنے والے اس فیل قامت کے ڈھانچے کی نیلامی لیوں شہر کے ایک ریلوے اسٹیشن میں کی گئی۔ اس ڈھانچے کی اونچائی 3.4 میٹر اور لمبائی 5.3 میٹر ہے۔
دانت اور اسّی فیصد ہڈیاں اصلی
ناپید ہو چکی قدیم حیوانی زندگی کے ماہر محققین کے مطابق اس ماموت کے دونوں بہت بڑے بڑے دانتوں کے علاوہ اس کی اسّی فیصد ہڈیاں بھی ابھی تک اپنی اصلی حالت میں ہیں۔
قریب بارہ ہزار سال پرانا اونی ماموت
یہ ڈھانچہ 11,700 برس قبل ختم ہونے والے اس دور کا ہے، جب ماموت ناپید ہو رہے تھے اور کرہء ارض کے مختلف حصوں میں جدید دور کے انسان کا پھیلاؤ شروع ہو چکا تھا۔
کمپنی ہیڈکوارٹر میں مستقل نمائش کا ارادہ
اسٹراسبرگ کے قریب واٹر پروفنگ میٹریل بنانے والی کمپنی سوپریما کے مالک اور اس ڈھانچے کے خریدار اسے اپنی کمپنی کے ہیڈکوارٹر میں مرکزی دروازے کے قریب ایک ہال میں مستقل نمائش کے لیے رکھنا چاہتے ہیں۔