امریکی وفاقی حکومت کا جزوی شٹ ڈاؤن، مذاکراتی عمل جمود کا شکار

امریکی کانگریس کے ایوانِ نمائندگان کی اکثریتی جماعت ری پبلکن پارٹی کی جانب سے وفاقی حکومتی اداروں کی جزوی بندش کے خاتمے کے لیے ایک کم مدتی پلان پیش کیا گیا تھا۔ اس پلان میں قرضے کی زیادہ سے زیادہ حد کو بڑھانے کو عبوری مدت کے لیے تجویز کیا گیا ہے۔ اس پلان کو بظاہر امریکی صدر اوباما نے نہ ہی قبول کیا ہے اور نہ ہی مسترد۔ تاہم نیو یارک ٹائمز نے رپورٹ کیا ہے کہ اس منصوبے کو صدر اوباما نے مسترد کر دیا ہے۔ ایسے امکانات سامنے آئے ہیں کہ ری پبلکن پارٹی کے لیڈران اور امریکی صدر کے درمیان جمعرات کی شام مزید بات چیت ہو سکتی ہے۔ نیوز ایجنسی اے پی کے مطابق سہ پہر کی بے نتیجہ رہنے والی میٹنگ نوّے منٹ تک جاری رہی۔

ری پبلکن پارٹی کے اہم اور سینیئر رہنماؤں کی صدر اوباما کے ساتھ ہونے والی میٹنگ کے حوالے سے وائٹ ہاؤس کی جانب سے کہا گیا کہ وفاقی حکومتی اداروں کی جزوی بندش ختم کرنے کی مناسبت سے معاملات میں کوئی مثبت پیش رفت سامنے نہیں آ سکی ہے۔ یہ بات بھی سامنے آئی ہے کہ امریکی صدر بجٹ معاملات پر بات چیت سے قبل وفاقی اداروں کی جزوی بندش کو ختم کرنا اہم خیال کر رہے ہیں۔ ری پبلکن اراکینِ ایوانِ نمائندگان سے ملاقات سے قبل امریکی صدر نے سینیٹ میں اکثریتی جماعت ڈیموکریٹک پارٹی کے اراکین سے بھی ملاقات کی۔ ایسے اشارے سامنے آئے ہیں کہ ایسا خیال کیا گیا ہے کہ اوباما انتظامیہ اور کانگریس کے درمیان آج جمعے کے دن ڈیل ہو سکتی ہے۔

امریکی صدر کے ساتھ ملاقات کے بعد ایوانِ نمائندگان میں ری پبلکن پارٹی کے سینیئر رہنما پال ریان نے کانگریس کی عمارت میں پہنچ کر ذرائع ابلاغ کے نمائندوں کو بتایا کہ ان کی تجویز پر صدر کی جانب سے ہاں یا نہیں سامنے نہیں آیا ہے۔ ان کی امریکی صدر کے ساتھ میٹنگ وائٹ ہاؤس میں ہوئی تھی۔ اس میٹنگ میں ایوانِ نمائندگان میں اکثریتی پارٹی کے لیڈر ایرِک کینٹر بھی تھے اور ان کا کہنا ہے کہ مالی بحران کے معاملے کو حل کرنے کے لیے ایوانِ نمائندگان اور وائٹ ہاؤس کی ٹیمیں جمعرات کی رات بھی حائل مشکلات کو حل کرنے کی کوششیں جاری رکھیں گی۔

جمعرات کی سہ پہر میں وائٹ ہاؤس میں ہونے والی میٹنگ کے حوالے سے ری پبلکن پارٹی کے سینیئر رہنما ایرک کینٹر کا کہنا ہے کہ صدر اوباما کے ساتھ ہونے والی بجٹ میٹنگ خاصی مفید تھی۔ اس میٹنگ کی روشنی میں مالی بحران کے معاملے پر مزید پیش رفت ممکن ہے۔ ری پبلکن پارٹی کی جانب سے حکومتی اخراجات کے لیے قرضے کی ابتدائی حد میں عارضی اضافے کی تجویز بدستور لٹک رہی ہے۔ ایوانِ نمائندگان کے اسپیکر جان بینر بھی میٹنگ میں شریک تھے لیکن ان کی جانب سے کوئی بیان سامنے نہیں آیا ہے۔ جان بینر کا تعلق بھی ری پبلکن پارٹی سے ہے۔