امریکی نیشنل میڈلز امرتیا سین اور ایل پچینو کے نام

وائٹ ہاؤس کے ذرائع کے مطابق ایل پچینو کو فن اور امرتیا سین کو انسانیت کے لیے کی گئی ان کی خدمات کے اعتراف میں نیشنل میڈلز دیے جائیں گے۔ یہ میڈلز ہر سال مختلف شعبوں میں کارہائے نمایاں سر انجام دینے والی شخصیات میں تقسیم کیے جاتے ہیں۔ رواں سال ایل پچینو اور امرتیا سین کے علاوہ متعدد دیگر شخصیات اس اعزاز کی حقدار قرار پائیں گی۔

اطالوی نژاد امریکی اداکار، ہدایت کار و فلم ساز ایل پچنیو چار دہائیوں سے ہالی وڈ سے جڑے ہوئے ہیں۔ 25 اپریل 1940ء کو پیدا ہونے والے ایلفریڈو جیمز ایل پچینو نے 1969ء میں پہلی مرتبہ Me, Natalie نامی فلم میں ایک معاون اداکار کی حیثیت سے کام کیا۔ انہیں اصل شہرت 70ء کی دہائی میں بنائی گئی فلم ’دا گاڈ فادر‘ سے حاصل ہوئی، جس میں پچینو نے ایک اطالوی گینگسٹر مائیکل کورلیونی کا کردار نبھا کر اسے امر کر دیا۔ اس کے بعد سے ان پر ایک طرح سے ’گینگسٹر‘ کی چھاپ پڑ گئی اور وہ چور، ڈکیت اور بدمعاش کے روپ میں پردہ سیمی پر شائقین کے سامنے پیش ہوتے رہے۔

پچینو نے پولیس انسپیکٹر اور وکیل جیسے قانون دوست کردار بھی ادا کیے مگر انہیں اصل شہرت ولن کے کرداروں سے ہی ملی اور شائقین کی بڑی تعداد انہیں اسی روپ میں پسند کرنے لگی۔ جہاں تک بھارتی ماہر اقتصادیات امرتیا سین کا تعلق ہے، تو وہ غربت کے بنیادی اسباب پر کی گئی اپنی تحقیق کے حوالے سے اقتصادیات کا نوبل انعام اپنے نام کرچکے ہیں۔ انہیں 1998ء میں نوبل انعام دیا گیا تھا اور اب انہیں انسانیت کی خدمت کے زمرے میں امریکہ کا نیشل میڈل دیا جارہا ہے۔

ریاست مغربی بنگال میں جنم لینے والے امرتیا سین نے قحط کی وجوہات، اس کے سدباب یا اس کے اثرات کو کم تر کرنے، خوراک کی حقیقی قلت یا جعلی بحران سے متعلق امور پر تحقیق کی اور عملی حل پیش کیے۔ انہوں نے اقوام متحدہ کے شماریے برائے انسانی ترقی United Nations Human Development Index کی تیاری میں اہم کردار نبھایا۔ ان دنوں پروفیسر امرتیا سین لندن کی ہارورڈ یونیورسٹی میں اقتصادیات اور فلسفے کے مضامین پڑھاتے ہیں۔

رپورٹ: شادی خان سیف

ادارت: شامل شمس