امریکہ میں چھ سالہ بچے نے ٹیچر کو گولی مار دی

امریکہ میں نیوپورٹ نیوز شہر کی پولیس اور اسکول حکام کے مطابق ورجینیا ریاست کے ایک اسکول میں جمعے کے روز ایک چھ سالہ بچے نے ایک ٹیچر کو گولی مار کر زخمی کر دیا۔

فائرنگ کا یہ واقعہ رچنیک ایلیمنٹری اسکول کے درجہ اول کے ایک کلاس روم میں پیش آیا تاہم اس میں کوئی طالب علم زخمی نہیں ہوا۔

فائرنگ کے بارے میں ہم کیا جانتے ہیں؟

پولیس چیف اسٹیو ڈریو نے نامہ نگاروں کو بتایا کہ اس فائرنگ میں ایک 30 سالہ خاتون ٹیچر بری طرح زخمی ہو گئیں۔ انہیں اتنے شدید زخم آئے ہیں جس سے جان کو خطرہ لاحق ہوسکتا ہے تاہم ہسپتال میں اب ان کی حالت میں کچھ بہتری نظر آ رہی ہے۔

ڈریو کا کہنا تھا، "ہمارے سامنے ایسی کوئی صورت حال نہیں تھی جس سے یہ کہا جا سکے کہ کوئی شخص اسکول میں فائرنگ کرنے جا رہا ہو۔"

امریکی سپریم کورٹ کا شہریوں کو اسلحہ لے کر چلنے کے حق میں فیصلہ

انہوں نے مزید کہا، "یہ کوئی حادثاتی فائرنگ نہیں تھی۔"

امریکہ میں قتل عام کی طویل خونی فہرست

فائرنگ کرنے والے لڑکے کو پولیس نے اپنی حراست میں لے لیا ہے۔ لیکن فائرنگ کے بارے میں مزید معلومات فراہم نہیں کی گئیں۔

پولیس کا کہنا ہے کہ لڑکے کے پاس کلاس روم میں ایک ہینڈگن تھی اور تفتیش کار یہ پتہ لگانے کی کوشش کر رہے ہیں کہ یہ اس بچے کے ہاتھ کیسے لگی۔

نیوپورٹ نیوز شہر صدمے میں

گوکہ فائرنگ کے اس واقعے سے کوئی بچہ زخمی نہیں ہوا تاہم اس واقعے نے شہر کو ہلا کر رکھ دیا ہے۔

ورجینیئن پائلٹ نامی ایک مقامی اخبار سے گفتگو کرتے ہوئے اسی سکول میں پڑھنے والے ایک بچے کی والدہ جوسیلین گلوورنے کہا کہ انہیں اسکول سے ایک پیغام موصول ہوا جس میں کہا گیا تھا کہ ایک شخص کو گولی مار دی گئی ہے اور دوسرا حراست میں ہے۔

انہوں نے کہا، "میرا تو دل ہی دھڑکنا بند ہو گیا، میں بہت گھبرا گئی، میں بے چین ہو گئی اور صرف یہ سوچ رہی تھی کہ وہ ایک شخص کہیں میرا بیٹا تو نہیں۔"

امریکہ: فائرنگ کے مختلف واقعات میں چھ افراد ہلاک

شہر کے اسکولوں کے نگراں جارج پارکر نے کہا، "میں صدمے میں ہوں اور دل گرفتہ ہوں۔"

انہو ں نے کہا، "آج ہمارے طلبہ کو بندوق کے تشدد کا سبق ملا۔ انہیں یہ بھی سبق ملا کہ بندوقیں کس طرح، نہ صرف تعلیمی ماحول بلکہ ایک خاندان اور ایک کمیونٹی میں بھی تباہی پھیلا سکتی ہیں۔"

ج ا/ ش ح (روئٹرز، اے پی، اے ایف پی)