البانیا نے مہاجرین کے یورپی مراکز کی میزبانی سے انکار کر دیا

اپنے ہاں مہاجرین کے خصوصی مراکز کے قیام کی یورپی تجویز مسترد کرتے ہوئے البانیا کے وزیر اعظم ایڈی راما کا یہ بھی کہنا تھا کہ انسانوں کے ساتھ ’زہریلے فاضل مادے‘ جیسا برتاؤ نہیں کیا جانا چاہیے۔ گزشتہ چند ہفتوں سے یہ موضوع زیر بحث تھا کہ یورپی یونین میں مہاجرین کے بحران سے نمٹنے کے لیے پناہ کے متلاشی افراد کو یونین کی حدود سے باہر کسی ملک میں بنائے گئے خصوصی مراکز میں رکھا جائے گا۔ ایسے تارکین وطن کی سیاسی پناہ کی درخواستیں انہی مراکز میں قیام کے دوران ہی نمٹائی جائیں گی۔

البانیا کی سرحدیں یونان سے بھی ملتی ہیں اور یہ مشرقی یورپی ملک اٹلی سے بھی زیادہ دور نہیں۔ اسی وجہ سے یہ تجویز سامنے آ رہی تھی کہ یورپی یونین کی حدود سے باہر مہاجرین کے مراکز کے قیام کے لیے البانیا ہی موزوں جگہ ہو گی۔

تاہم آج ستائیس جون بروز بدھ البانیا کے وزیر اعظم ایڈی راما نے جرمن روزنامے ’بلڈ‘ سے گفتگو کرتے ہوئے اس تجویز کو مسترد کر دیا۔ ان کا یہ بھی کہنا تھا کہ ایسے خصوصی مراکز کے قیام کا مطلب ’پناہ کے متلاشی افراد کو ایسے زہریلے فاضل مادے کی طرح کسی جگہ پھینک دینے کے مترادف ہے، جسے کوئی بھی اپنانا نہیں چاہتا‘۔

مشرقی یورپ میں واقع ملک البانیا یورپی یونین کی رکنیت کے حصول کی بھی کوشش میں ہے۔ تاہم البانوی وزیر اعظم نے بلڈ سے گفتگو کرتے ہوئے یہ بھی کہا ہے کہ انہوں نے برسلز پر واضح کر دیا ہے کہ رکنیت کے حصول کے مذاکرات میں تارکین وطن کے خصوصی مراکز کے قیام کی شرط شامل کر کے البانیا کو اس معاملے پر قائل نہیں کیا جا سکتا۔

یورپی یونین نے گزشتہ روز ہی آئندہ برس جون میں البانیا کی رکنیت کے سلسلے میں مذاکرات شروع کرنے پر اتفاق کیا تھا۔ مہاجرین کے لیے خصوصی مراکز کے بارے میں البانیا کے اس واضح اعلان کے بعد امکان ہے جمعرات کے روز شروع ہونے والی یونین کی سمٹ میں مہاجرین کے بحران سے نمٹنے کے لیے ’مشترکہ یورپی حل‘ کی تلاش مزید مشکل ہو جائے گی۔

ش ح/ ص ح (اے ایف پی)