افغان امن کونسل کا دورہ پاکستان کیوں ملتوی ہوا؟

یہ دورہ ایک ایسے وقت پر ملتوی کیا گیا ہے جب سرحدی خلاف ورزیوں کے معاملے پر دونوں پڑوسی ملکوں کے درمیان تعلقات میں کشیدگی پائی جاتی ہے۔ تفصیلات پیش کر رہے ہیں اسلام آباد سے شکور رحیم

افغان امن کونسل کے وفد کا دورہ ملتوی ہونے کے بارے میں پاکستان میں سرکاری سطح پر خاموشی ہے۔ دفتر خارجہ کے ترجمان معظم احمد خان سے بارہا رابطہ کرنے کے باوجود اس معاملے پر ان کا مؤقف نہیں مل سکا۔

اسلام آباد میں قائم افغان سفارتخانے کے ذرائع کا کہنا ہے کہ افغان امن کونسل کے وفد کا دورہ ایجنڈے کے نکات پر اتفاق رائے نہ ہونے کی وجہ سے ملتوی کیا گیا ہے۔

امریکی خبر رساں ادارے ایسوسی ایٹیڈ پریس نے کابل میں افغان امن کونسل کے ایک رکن کا حوالہ دیتے ہوئے خبر دی ہے کہ ایک ایسے موقع پر جب پاکستان مبینہ طور پر افغانستان پر گولہ باری کر رہا ہے تو یہ مناسب نہیں ہوگا کہ اسلام آباد کا دورہ کیا جائے۔

افغان امن کونسل کے ایک اور رکن کا کہنا تھا کہ یہ دورہ دو ہفتوں کے لیے ملتوی کیاگیا ہے اور عید الفطر کے بعد افغان وفد اسلام آباد جائے گا۔

پاک افغان امور کے تجزیہ کار طاہر خان کا کہنا ہے کہ صرف سرحدی کشیدگی ہی نہیں بلکہ دیگر کچھ ایسے حل طلب امور بھی ہیں جن کی وجہ سے افغان وفد کا دورہ ممکن نہیں ہو سکا۔ طاہر خان نے کہا: ’’ افغانستان کی امن کونسل کے پاکستان کے ساتھ اجلاس کے ایجنڈے کے حوالے سے کچھ مطالبات ہیں، مثال کے طور پر اس میں ایک یہ ہے کہ وہ طالبان رہنماء جو پاکستان کی قیدمیں ہیں ان کو رہا کیا جائے یا کم از کم ان تک افغان حکام کو رسائی دی جائے تا کہ ان کے ساتھ بات چیت کی جا سکے۔ افغانستان کو یہ گلہ رہا ہے کہ جو طالبان رہنما ان سے بات چیت کرنا چاہتے ہیں انہیں اغواء کر لیا جاتا ہے یا انہیں پکڑ کر قتل کر دیا جاتا ہے۔‘‘

طاہر خان کا کہنا ہے کہ گزشتہ برس فروری میں افغان صدر حامد کرزئی نے دورہ پاکستان کے موقع پر بھی ان تحفظات کا اظہار کیا تھا کہ پاکستان طالبان کے ساتھ افغان حکومت کے مذاکرات کے لیے مطلوبہ اقدامات نہیں کر رہا۔

خیال رہے کہ افغان امن کونسل کے وفد کو سابق پاکستانی وزیراعظم یوسف رضا گیلانی اور موجودہ وزیراعظم راجہ پرویز اشرف نے کابل کے اپنے الگ الگ دوروں میں اسلام آباد آنے کی دعوت دی تھی۔

اسلام آباد میں قائم تھنک ٹینک اسٹریٹجک اسٹڈیز کی ڈائریکٹر سنبل خان کا کہنا ہے کہ پاکستان اور افغانستان کے درمیان حل طلب مسائل ہمیشہ رہے ہیں لیکن سرحدی کشیدگی کا معاملہ اس حد تک بڑھ چکا ہے کہ گزشتہ ہفتے صدر حامد کرزئی کے قریبی ساتھی اور افغان وزیر دفاع رحمت وردگ کو پارلیمنٹ کے فیصلے پر اپنا عہدہ چھوڑنا پڑا۔ سنبل خان کا کہنا ہے کہ پاکستان کی جانب سے افغان سرحد سے حملوں کا الزام اپنی جگہ لیکن موجودہ حالات میں دونوں ممالک کے درمیان تعلقات کی بہتری کے لیے پاکستان کو قائدانہ کردار ادا کرنا ہوگا۔

انہوں نے کہا: ’’پاکستان کو تحمل دکھانا ہے اور ہمیں اپنی طرف جتنی چیک پوسٹیں ہیں ان کی سیکورٹی بڑھانی چاہیے۔ پاکستان سمجھتا ہے کہ وہ سرحد پار عسکریت پسندوں کے ٹھکانوں پر گولہ باری کر رہا ہے لیکن اس گولہ باری سے سرحدی دیہات میں رہنے والے لوگ متاثر ہو رہے ہیں اور اسی وجہ سے پاکستان اور افغانستان میں کشیدگی بڑھ رہی ہے۔‘‘

رپورٹ: شکور رحیم، اسلام آباد

ادارت: ندیم گِل