اسلامک اسٹیٹ کا ساتھ ، ’جیل یا موت‘

تیونس سے تعلق رکھنے والے غیث کو اسلامک اسٹیٹ کا ساتھ چھوڑے ایک سال سے بھی زائد کا عرصہ ہو گیا ہے اور وہ آج بھی خوف کے عالم میں زندگی گزارنے پر مجبور ہے۔ وہ ایک برس پہلے تک شام میں آئی ایس کا ساتھ دے رہا تھا۔ اب وہ مستقل طور پر تمباکونوشی کی لت میں مبتلا ہو چکا ہے۔ وہ اندھا دھند قتل و غارت گری کے واقعات بیان کرتا ہے۔ اس نے اپنی آب بیتی کے دوران بتایا کہ آئی ایس کی جانب سے کس طرح خواتین ریکروٹس کے ساتھ زیادتی کی جاتی تھی اور انہیں سونے اور کھانے پینے کے لیے کوئی مناسب جگہ تک میسر نہ تھی۔

غیث کا مکمل نام دانستہ طور پر خفیہ رکھا گیا ہے۔ وہ بتاتا ہے ’’جہاد کے بارے میں وہ جو کچھ بھی کہتے تھے، زمینی حقائق اس سے بالکل مختلف تھے‘‘۔

غیث جنت کی لالچ میں جہاد کے لیے شام گیا تھا۔ اس کے بقول شام پہنچنے پر وہ یہ دیکھ کر حیران رہ گیا کہ کس طرح خواتین ساتھیوں کو جنسی تعلق پر مجبور کیا جا رہا تھا۔ ’’ کچھ واقعات میں تو ایک ایک رات کے لیے مختلف مردوں کے ساتھ ان کی شادی بھی کرا دی جاتی تھی۔ یہ سب کچھ زبردستی ہوتا تھا کیونکہ انہیں(خواتین) کو علم تھا کہ انکار کرنے پر انہیں قتل کر دیا جائے گا۔‘‘ غیث کی طرح آئی ایس کا ساتھ چھوڑ کر آنے والے کئی دیگر افراد نے بھی اسی طرح کی کہانیاں سنائی ہیں۔ وہ بتاتے ہیں کہ کیمپوں میں موجود کچھ افراد تو اس طرح کے رویے کو اسلام میں جائز قرار دیتے تھے۔

وہ مزید بتاتا ہے کہ آئی ایس میں شامل ہونے والے نئے افراد کو بہت جلد ہی اندازہ ہو جاتا تھا کہ اس تنظیم میں شامل ہونا جتنا آسان ہے اسے چھوڑنا اتنا ہی مشکل ہے۔ غیث کے بقول اگر کوئی فرار ہونے میں کامیاب بھی ہو جائے تو اس کی کیفیت ایسی ہو جاتی تھی کہ جیسے وہ کسی بھنور میں پھنس گیا ہے۔ ’’ ایک جانب اپنے سابق جنگجو ساتھیوں کا خوف تو دوسری طرف سلامتی کے اداروں کا ڈر۔‘‘ آئی ایس کا ساتھ دے کر واپس آنے والے ہزاروں شمالی افریقی یا یورپی باشندوں کی آج کل یا تو کڑی نگرانی کی جا رہی ہے یا پھر وہ جیل میں ہیں۔

غیث نے بتایا کہ اس نے قتل کے کچھ واقعات میں شامل ہونے سے انکار کر دیا، جس کے بعد جنجگو اس کی طرف متوجہ ہو گئے۔’’ ایک رات کچھ جنگجوؤں نے میرے گلے پر خنجر رکھ کر مجھ سے قرآن کی کچھ آیات سنیں اور جنگ کے طریقہ کار کے بارے میں پوچھا کیونکہ وہ میری وفاداری جاننا چاہتے تھے۔‘‘

غیث شامی فوج کے سامنے ہتھیار ڈالتے ہوئے خود کو آئی ایس کے چنگل سے آزاد کرانے میں کامیاب ہوا۔ شام میں اسے چار روز تک قید میں رکھا گیا اور بعد میں اسے اس کے والدین کے پاس بھیج دیا گیا۔ تاہم ہر ایک کی قمست غیث کی طرح نہیں ہوتی ایسے بہت سے نوجوان ہیں، جو آئی ایس کے نرغے سے نکلنے کی کوشش کے دوران اپنے ہی کمانڈروں کے ہاتھوں قتل کر دیے گئے۔