اردن اسرائيلی سرحد پر تين اسرائيلی محافظ ہلاک

اسرائيلی فوج نے دعویٰ کيا ہے کہ مقبوضہ مغربی کنارے اور اردن کی سرحدی گزر گاہ پر ايک ٹرک ڈرائيور نے فائرنگ کر کے تين اسرائيلی گارڈز کو ہلاک کر ديا ہے۔ سکيورٹی فورسز نےجوابی کارروائی ميں حملہ آور کو بھی ہلاک کر ديا۔ فوجی بيان کے مطابق ٹرک ڈرائيور اپنی گاڑی سے اترا اور اس نے سرحدی گزرگاہ پر تعينات اسرائيلی محافظوں پر فائرنگ کر دی۔ اسرائيل کا دعویٰ ہے کہ 'دہشت گرد‘ اردن سے اس علاقے ميں داخل ہوا تھا۔ اسرائيلی حکام نے قبل ازيں کہا تھا کہ ہلاک ہونے والے عام شہری تھے تاہم بعد ازاں وضاحت کی گئی کہ وہ سرحدی محافظ تھے مگر وہ پوليس يا فوج کا حصہ نہ تھے۔

فلسطينی تنظيم حماس کی جانب سے گزشتہ برس سات اکتوبر کو کيے گئے دہشت گردانہ حملے اور اس کے رد عمل ميں شروع ہونے والی حماس اور اسرائيل کی جنگ کی وجہ سے مغربی کنارے ميں بھی تشدد ميں اضافہ ديکھا گيا ہے۔ حماس کو يورپی يونين، امريکا اور چند ديگر مغربی ملک 'دہشت گرد‘ تنظيم قرار ديتے ہيں۔

امریکی اور برطانوی خفیہ اداروں کے سربراہان کا غزہ میں فائر بندی پر زور

صرف فوجی طریقہ غزہ کی جنگ کا کوئی حل نہیں، جرمن وزیر خارجہ

غزہ میں جنگ بندی معاہدہ اب ناگزیر ہو چکا، امریکہ

سات اکتوبر سے اب تک اسرائيلی فوج يا مشتعل آباد کاروں کی جانب سے صرف مغربی کنارے ميں 662 فلسطينيوں کو ہلاک کيا جا چکا ہے۔ اس دوران فلسطينيوں کے حملوں ميں 23 اسرائيلی بھی ہلاک ہو چکے ہيں، جن ميں سکيورٹی فورسز کے ارکان بھی شامل ہيں۔

حزب اللہ اور اسرائيلی فورسز کے مابين جھڑپيں

دريں اثناء لبنانی عسکريت پسند تنظيم حزب اللہ اور اسرائيلی سکيورٹی فورسز کے مابين بھی جھڑپوں کی اطلاعات ہيں۔ اتوار کو فريقين نے اس کی تصديق کی۔ حزب اللہ کے مطابق اس کی جانب سے شمالی اسرائيل ميں کريات شمانا کے شہر کو نشانہ بنايا گيا۔ اس تنظيم کے مطابق اس کی جانب سے 'دشمن کے حملوں کے رد عمل ميں يہ کارروائی کی گئی، بالخصوص اس حملے کے جواب ميں جس ميں لبنانی ديہات فرون ميں ايمرجنسی رضاکار مارے گئے۔ قبل ازيں ہفتے کو لبنانی وزارت صحت نے بتايا تھا کہ فرون ميں ايک اسرائيلی حملے ميں ايمرجنسی سروسز مہيا کرنے والے تين اہلکار ہلاک اور دو ديگر زخمی ہو گئے تھے۔

ان جھڑپوں کے بارے ميں اسرائيلی فوج کے اتوار کو جاری کردہ بيان ميں کہا گيا کہ رات گئے حزب اللہ کے ميزائل حملوں کو ناکام بنايا گيا جب کہ اس عسکريت پسند تنظيم کے ٹھکانوں کو بھی ہدف بنايا گيا۔

غزہ میں سول ايمرجنسی سروس کے ڈپٹی ڈائريکٹر ہلاک

غزہ پٹی کے شمالی حصے ميں ايک اسرائيلی فضائی حملے ميں غزہ سول ايمرجنسی سروس کے ڈپٹی ڈائريکٹر محمد مرسی اپنے چار اہل خانہ کے ہمراہ ہلاک ہو گئے۔ طبی حکام نے ان کی ہلاکت کی تصديق کی ہے۔ سول ايمرجنسی سروس کے مطابق سات اکتوبر سے اب تک اس امدادی ادارے کے 83 اہلکار اسرائیلی فوج کے ہاتھوں مارے جا چکے ہيں۔

ابھی تک اسرائيل کی جانب سے اس پر کوئی رد عمل سامنے نہيں آيا۔ 

جباليہ ميں علاقہ مکينوں نے نيوز ايجنسيوں کو بتايا ہے کہ شہر سے پانچ کلوميٹر کے فاصلے پر واقع زيتون نامی علاقے ميں بھی اسرائيلی فوج کے حملوں ميں کئی رہائشی عمارات کو نقصان پہنچا ہے۔

اسرائيل اور حماس کی جنگ ميں مقامی وزارت صحت کے مطابق اب تک 40,972 فلسطينی ہلاک ہو چکے ہيں۔ غزہ کی 2.3 ملين کی آبادی کا اکثريتی حصہ بے گھر بھی ہو چکا ہے۔

ع س/ا ب ا، ع ا (روئٹرز، اے ایف پی، اے پی)