په پاکستان کې د کرونا واکسين تجارتي خرڅلاو پيلیږي

په دې توګه به پاکستان د نړۍ لومړی هيواد وي چې سړی پکې په شخصي توګه واکسين رانيولی او تطبیقولی شي.

د «ای جي پي» د درملو شرکت د تجارتي طرحو او چارو مشر عمير مختار وويل: «ټولې چارې تنظيم شوي دي او موږ د جمعې په ورځ د واکسينو په خرڅلاو لاس پورې کولو ته چمتو يو.»

دغه شرکت د روسیې د سپوتنک ۵ واکسين لومړي ۵۰ زره دوزه لا تيره میاشت وارد کړي دي.

ويل شوي چې واکسين له حکومت سره د واکسين بيې پرسر لانجې له کبله پاکستان ته تر رسيدو وروسته په کراچۍ ښار کې ساتل شوی دی. په لومړی سر کې حکومت، سپوتنک واکسين ته په پاکستان کې د دوو ډوزو له پاره ۸۴۴۹ کلداري ثابته بيه ټاکلې وه چې دا ۵۴ ډالر کیږي.

خو د «ای جی پي» شرکت دا بیه په دې دليل رد کړې وه چې واکسين یې په لوړ بيه وارد کړی او دا ورته ګټه نه کوي.

عمير مختار وویل چې هر وګړی دا واکسين د حکومت له خوا منظور شويو روغتيايي مرکزونو څخه ترلاسه کولی شي.

خو د پاکستان د ساينس او تکنالوژۍ وزیر فواد چوهدري له رسنیو سره په خبرو کې وویل چې د روسیې سپونتيک واکسين بيه تر اوسه ټاکل شوې نه ده. هغه زياته کړه چې حکومت به د خپل ۹۸ سلنه نفوس له پاره د واکسيناسيون زمينه برابره کړي.

اړونده موضوع:پاکستان د کرونا واکسین ملي پروګرام پیل کړ

د شخصي واکسيناسيون اجازه به هغو کسانو ته ورکول کيږي چې نه غواړي عمومي واکسين ته انتظار وکړي.

تر دې مخکې د پاکستان شفافيت بنسټ «ټي آيي پي» له حکومته غوښتي ول چې پر خپله پريکړه غور وکړي ځکه چې د واکسين بیه ډېره لوړه ده او دا به پر شخصي روغتونو د حکومتي واکسين د خرڅلاو زمينه برابره کړي چې دا به بيا «د اختلاس د رامنځته کیدو باعث» شي.

پاکستان په فيبرورۍ میاشت کې د زينوفارم واکسين په کارولو سره چې د چين د دولت له خوا تحفه شوی وو، په واکسيناسيون لاس پورې کړ.

ب. ص/ ن.ز (dpa)