طالبان: په يوه اونۍ کې د پاسپورتونو وېش پیلېږي
۱۴۰۱ اسفند ۴, پنجشنبه
د طالبانو د پاسپورت ادارې تر څو میاشتو ځنډ وروسته نن د دغه بهیر د پیلېدو خبر ورکړ.
د طالبانو د پاسپورت ریاست رئیس عبدالکریم حسیب نن پنجشنبه په کابل کې یوې خبري غونډې ته وویل چې دغې ادارې پریکړه کړې چې تر راتلوونکې چهارشنبې ورځي پوري په ټول افغانستان کې د پاسپورټونو د ویش بهیر بیا پیل کړي.
اړوند:د پاسپورتونو د وېش بندیدو خلک له کومو ستونزو سره مخ کړې دي؟
دغه رياست وايي چې هره ورځ به شاوخوا لس زره پاسپورټونه په مرکز کابل او ولايتونو کې خلکو ته وېشل کېږي.
د طالبانو د پاسپورت ریاست چارواکي ټینګار کوي چې د پاسپورټونو د ترلاسه کولو له پاره خلکو ته آنلاین فورمې شته.
د طالبانو د پاسپورت رياست رئیس زياتوي، سره له دې چې د دې رياست له خوا د جعلکارانو مخه نيول شوې، خو بيا هم د ډېرو کمیشنکارانو له خوا خلکو ته جعلي پاسپورټونه وېشل کېږي.
اړوند:د پاسپورتونو وېش بند شوی؛ د بې بایو متریکه پاسپورتونو بازار تود شوی
د پاسپورت د وېش بهیر شپږ میاشتې وړاندې د طالبانو له خوا د تخنیکي ستونزو له امله ودرول شو، خو بیا هم راپورونه ورکول کېدل چې یو شمېر پاسپورت غوښتونکي د زرګونو ډالرو په ورکولو سره پاسپورتونه ترلاسه کوي.
په افغانستان کې د طالبانو له واک ته رسېدلو وروسته په دغه هېواد کې د پاسپورتونو د وېش بهیر څو ځله ودرول شو.
د یادونې وړ ده چې د طالبانو دغې پرېکړې د ناروغانو او زده کوونکو په ګډون د دغه هېواد په زرګونو خلک له ګڼو ستونزو سره مخ کړي دي.