شمالي او جنوبي کوریاګانو یو بل سخت ګواښلي دي
۱۴۰۲ دی ۲۶, سهشنبه
د شمالي کوریا دولتي رسنيو د سه شنبې په ورځ رپوټ ورکړی دی چې د دغه هېواد رهبر، کیم جونګ اون، د درو مهمو حکومتي سازمانونو فعالیتونه کوم چې له جنوبي کوریا سره د مناسباتو د تنظیمولو په برخه کې کار کوي، لغوه کړي دي. دواړه کورياوې اوس په «یوسخت تقابل» کې سره راګېرې شوي دي.
د کوریا مرکزي خبري آژانس (KCNA) وویل له جنوبي کوریا سره د مناسباتو او همکاريو په برخه کې د فعالیت لرونکو سازمانونو د لغوه کولو دغه تصمیم د دوشنبې په ورځ د شمالي کوریا پارلمان له لوري د پلاستيکی مهر په لګولو سره ونيول شو.
د خلکو عالي جرګې په یوه اعلاميه کې ويلي دي چې «د هېواد د سوله ايز بیا اتحاد له پاره کمېټه، د اقتصادي همکاریو ملي بيرو او د توریزم نړېواله اداره (ماونت کومګانګ) کوم چې د (شمال-جنوب) تر منځ د دیالوګ، مذاکراتو او همکاریو له پاره ایجاد شوي، لغوه دي.»
په اعلاميه کې زياته شوې چې په پلازمينه پیونګ یانګ کې به حکومت د دغه تصمیم د اجرا له پاره «عملي اقدامات» ترسره کړي.
جرګې ويلي چې دواړه کوریاګانې اوس په يو «سخت تقابل» کې سره راګيرې دي او زیاته کړې ېې ده چې دا به د شمالي کوریا له پاره یوه شدیده تېروتنه وي که چېرته جنوبي کوریا خپل د ديپلوماسۍ یو شريک وګڼي.
د شمالي کوریا دغه تازه اقدام، په سيمه کې د وروستيو هغو اقداماتو د مجموعې یوه برخه ده چې د توپخانې او توغندیو پوځي تمرینات هم په کې شامل دي، هغه اقدامات چې په سیمه کې وضعیت ورسره لا پسې ترينګلي شوی دی.
د شمالي کوریا رهبر، کیم جونګ اون، غوښتي چې جنوبي کوریا دې د «تر ټولو متخاصم دولت» په توګه په نظر کې ونیول شي.
د یاد کوریايي خبري آژانس په رپوټ کې راغلي دي چې کیم همدارنګه ويلي دي چې شمالي کوریا به د دواړو هېوادونو تر منځ دې فاکتو سمندري پوله (Northern Limit Line) په رسميت ونه پېژنې او په اساسي قانون کې ېې د بدلون غوښتنه کړې ده. دغه کار د جګړې په صورت کې شمال ته د جنوب د «قبضه کولو» اجازه په لاس ورکولی شي.
کیم د خلکو عالي جرګې ته په یوه وينا کې د داسې نوو قانوني اقداماتو د تدوين غوښتنه وکړه چې په هغو کې شمالي کوريا «تر ټولو متخاصم دولت» په توګه تعریف شي.
د شمالي کوریا رهبر وويل: «زما په نظر، موږ کولی شو د آر او کې (د کوریا جمهوریت) د بشپړ ولکې، تابع کولو او بېرته نېولو موضوع په خپل اساسي قانون کې مشخصه کړو او په کوریايي نيمه ټاپو کې د جګړې د رامنځ ته کېدو په صورت کې ېې د خپل جمهوریت خاورې د یوې برخې په توګه الحاق کړو.»
هغه زیاته کړه: «که د کوریا جمهوریت حتی زموږ پر خاوره، هوا او اوبو کې د صفر اعشاریه صفر صفر ملي متره سرغړونه هم وکړي، نو هغه به یوې جګړې ته لمسون په نظر کې نيول کیږي.»
د جنوبي کوریا غبرګون
جنوبي کوریا هم ورته غبرګون ښودلی دی. د جنوبي کوریا ولسمشر، یون سوک یول، له خپلې کابېنې سره په خبرو کې وويل که چېرته د اتومي ځواک درلودونکی هیواد، شمال، کوم لمسون ته لمن وهي، سیول به ېې «په کراتو له ډېر قوت سره»، په شا تمبوي.
د جنوبي کوریا ولسمشر په دغه غونډه کې چې پر تلویزیون خپرېده د خپل هېواد د پوځ پراخې وړتیا ته په اشارې سره وويل: «که شمالي کوریا کوم پاروونکی اقدام وکړي، موږ به په کراتو له ډېر قوت سره غچ اخلو.»
mks/nz/dvv/wd (AFP, AP)
له آرشیف څخه (28.10.2019):