لویدیځه غاړه کې اسرائیلي برید سخته مرګ ژوبله اړولې ده

د فلسطین روغتیایې مسئولینو د دوشنبې په ورځ وویل چې د اردن سیند د لویدیځې غاړې په اشغال شوې سیمه کې د اسرائیلي پوځ په پراخو عملیاتو کې د یوه ۱۵ کلن تنکي ځوان په ګډون لږ تر لږه ۵ تنه فلسطینیان وژل شوي دي.

اسرائیل او د اسلامي جهاد ډله پر یوه اوربند موافقې ته رسیدلي

د فلسطین د روغتیا وزارت ویلي چې لږ تر لږه ۹۱ تنه ټپیان شوي چې د ۱۲ وضعیت یې د اندېښنې وړ دی. د اسرائیلي رسنیو په حواله ډير شمیر اسرائیلي عسکر هم ټپیان شوي دي.

اسرائیلي پوځ ویلي دي چې په پراخه کچه د ډزو تبادله هغه وخت پیل شوه، کله چې ځواکونه د دوو مطلوبو شکمنو کسانو د نیولو له پاره د جنین ښار ته ورننوتل. د پوځ په حواله پر اسرائیلي سرتیرو په پراخه پیمانه چاودیدونکي مواد وغورځول شول.

زمونږ له فیسبوک شبکې پاڼې سره یوځای شئ:

زمونږ له یوټيوب شبکې سره یوځای شئ:

د اسرائیل دفاعي ځواکونو (آی ډي ایف) په یوه اعلامیه کې وویل «ځواکونو په مستقیم ډول د ډزو ځواب ورکړ. هدف لا دمخه معلوم کړای شوی و.»

آی ډي ایف زیاته کړه «د ځواکونو په را ایستلو کې د مرستې په خاطر چورلکو پر وسله والو ډزې وکړې.» د اعلامیې په حواله له ښاره د بیرته وتلو پر مهال چاودنه کې د اسرائیل یو پوځي موټر ته هم زیان اوښتی دی.

ملګرو ملتونو او اروپايي اتحادیي د ښارګوټو جوړولو لړۍ پر بندولو ټینګار کړی

بل لور ته د ملګرو ملتونو عمومي منشي انتونیو ګوتیرش له فلسطین څخه غوښتنه کړې ده چې په اشغال شوو سیمو کې دې هر ډول ساختماني چارې په عاجل ډول بندې کړي.

اروپايي اتحادیې هم په جینن کې په خونړیو پیښو سخته انديښنه ښودلې ده او ویلي یې دي چې له دې امله څو تنه ملکیان وژل شوي دي.

د اروپايي اتحادیي د بهرنیو چارو دفتر یوه ویاند په یوه اعلامیه کې ویلي «پوځي عملیات باید متناسب او د نړیوالو بشري حقونو په اساس وي.»

اروپایي اتحادیې د روانې میاشتې تر وروستیو پورې د اردن سیند په لویدیځ اشغال شوې سیمه کې تر ۴۰۰۰ ډیرو ساختماني واحدونو پر اسرائیلي پروژې هم انديښنه څرګنده کړه او د دغو پروژو د بندولو غوښتنه یې وکړه.

په جنین کې د نښتو لړۍ

په جنین کې موقعیت درلودونکي د فلسطيني مهاجرو کمپ په پرله پسې ډول د تاوتریخوالي او د اسرائیلي پوځ له خوا د چاپو وهلو مرکز پاتې شوی دی، ځکه دا د وسله والو فلسطیني ډلو پر مرکز بدل شوی دی. مخکې تر دې په جنورۍ میاشت کې پر دې کمپ د چاپې وهل کیدو پر مهال ۱۰ او په مارچ میاشت کې بیا ۴ تنه نور وژل شوي ول.

د روان کال له پیل راهیسې تر اوسه پورې د اسرائیلي پوځ په بریدونو کې ۱۲۵ فلسطینیان وژل شوي دي. په همدې موده کې پر اسرائیلو د فلسطینیانو په بریدونو کې ۱۸ اسرائیلي، یو اوکرایني او یو ایټالوی تبع وژل شوي دي.

د اسرائيلو هوايي بريدونو د «اسلامي جهاد» ډلې هدفونه په نخښه کړي

اسرائیل په ۱۹۶۷ کال کې د عربو او اسرائیل ترمنځ جګړه کې چې شپږ ورځې یې دوام وکړ، د اردن سیند د لویدیځې غاړې او یروشلم یا بیت المقدس په ګډون یو شمیر نورې سیمې اشغال کړې وې. فلسطین دغه سیمې د خپل راتلونکي هیواد له پاره چې پلازمېنه یې ختیځ بیت المقدس وي، بیرته غواړي. خو پر دې موضوع د دواړو خوا ترمنځ خبرې اترې له ۲۰۱۴م کال راهیسې په ټپه ولاړې دي.

آژانسونه: ش.ن/ب.ص