اوکراین پر سومي ښار د توغندیز برید خبر ورکړی دی
۱۴۰۳ مرداد ۲۳, سهشنبه
اوکرایني چارواکو ویلي دي چې د اوکراین په ختیځ کې د «سومي» ښار د شپې په اوږدو کې د روسي توغندیو په وسیله هدف ګرځول شوی دی.
اوکرایني لوری معمولاً د احتمالي پوځي بریدونو په هکله خپل نظر نه څرګندوي. اوکرایني سرتیرو چې له یوې اونۍ راهیسې یې د روسیې پر کورسک سیمې بریدونه پیل کړي دي، د سومي له لارې خپل تدارکات ترلاسه کوي.
د اوکراین د هوایي ځواکونو په حواله روسي پوځ تیره شپه د «اسکندر» ډول دوه بالستیک توغندي او ۳۸ جنګي بې پیلوټه الوتکې د اوکراین پر لور توغولي دي. ویل شوي چې ۳۰ بې پيلوټه الوتکې خنثی کړای شوي دي. د اوکراین په ډیرو برخو کې په پراخه پيمانه د شپني خبردارۍ غږونه اوریدل کیدل.
د روسیې د دفاع وزارت ویلي دي چې تیره شپه ۱۴ بې پیلوټه الوتکې خنثی شوي دي چې اکثره یې د کورسک پر سیمې د پرواز په حال کې ول. دغه نظامي اطلاعات معمولاً په خپلواکه توګه نه شي تائیدلی.
د روسیې په خاوره کې د ۱۰۰۰ کیلومتره پرمختګ ادعا
د کیف له لورې د روسیې په خاوره کورسک سیمه کې د اوکراین د برید په هکله هیڅ ډول اطلاعات نه دي وړاندې شوي.
هغه رپوټ چې اوکرایني ځواکونه یې معمولاً د سهار له خوا خپروي په هغې کې د جبهې په نورو ټولو برخو او د ۱۳۴ انفرادي نښتو د وضعیت په اړه د دوشنبې په ورځ خبر ورکړل شوی دی، خو کورسک ته پکې هیڅ اشاره نه ده شوې.
د ټولو ځواکونو عمومي قوماندان اولکساندر سیسکیاما د دوشنبې په ورځ اعلان وکړ چې اوکراین د شاوخوا ۱۰۰۰ کیلومتره مربع سیمې کنترول په خپل لاس کې لري. خو د روسیې نظامي کتونکي تصور کوي چې روسي ځواکونه په تدریج سره توانیږي چې د اوکرایني ځواکونو د پرمختګ مخه ونیسي.
اوکراین له نږدې دوه نیمو کلونو راهیسې د روسیې د یرغل په مقابل کې له خپل ځان څخه دفاع کوي او د لومړي ځل له پاره یې جکړه د دښمن خاورې ته انتقال کړې ده.
په اتومي دستګاه کې د اورلګیدنې علت معلوم نه دی
د روسیې تر کنترول لاندې د اوکراین په خاوره کې د زاپوریژیا زیانمن شوي اټومي بټۍ د سړونکي برج له ارزیابۍ وروسته، د اټومي انرژۍ نړیوال آژانس په سمدستي توګه نه دی توانیدلی چې د اونۍ په پای کې د رامنځته شوي اور لګیدنې علت معلوم کړي.
د اټومي انرژۍ نړیوال آژانس (IAEA) واضح کړې ده چې «د مخکنیو موندنو پر اساس څیړونکې ډله نه ده توانیدلې چې د اور لګیدنې د علت په هکله قطعي نتیجه ګیري وړاندې کړي.» زیاته شوې ده چې په دغو تحقیقاتو کې د بې پیلوټه الوتکو د بقایاو مستقیمې نښې نښانې نه دي موندل شوي.
همدارنګه ویل شوي دي چې امکان نه لري چې په لومړي سر کې دې اور لګیدنه د سړونکو برجونو څخه پيل شوې وي.
نه هم مسکو او نه هم کیف د رادیو اکتیف شعاو د کچې زیاتیدو خبره کړې ده. دواړه خواوی په دغه له کاره لویدلي اټومي بټۍ کې د اور لګیدنې پړه پر یوه بل ور اچوي. دا په داسې حال کې ده چې روسیه د اوکراین د بې پیلوټه الوتکې د برید او کیف د روسیې د بې پروایئ خبره کوي.
آژانسونه: ش.ن/ ن.ز